காவலா் வீர வணக்க நாள் ஆயுதக் கண்காட்சி

காவலா் வீர வணக்க நாளை முன்னிட்டு, மதுரை மாவட்ட காவல் துறை சாா்பில் ஆயுதக் கண்காட்சி-2026 செவ்வாய்க்கிழமை நடைபெற்றது.

ஆயுதப்படை மைதானத்தில் நடைபெற்ற இந்தக் கண்காட்சி தொடக்க விழாவுக்கு மதுரை மாவட்ட காவல் கண்காணிப்பாளா் என். தேவநாதன் தலைமை வகித்தாா். காவல் துணைத் தலைவா் அபிநவ்குமாா் சிறப்பு விருந்தினராகக் கலந்து கொண்டு கண்காட்சியை தொடங்கி வைத்தாா்.

இதில், காவல் துறையினரால் பயன்படுத்தப்படும் இஸாபூா் 2ஏ1, இஸாபூா் 1ஏ1, இன்ஸாஸ், ஏகேஎம், ஏகே 103, தாவா் டாா் 21, எம் 4 ஏ1 காா்பைன் ரக துப்பாக்கிகள் காட்சிப்படுத்தப்பட்டன. மேலும், சமூகப் பாதுகாப்புக்காக காவலா்கள் ஆற்றி வரும் சேவைகள், தியாகங்கள் குறித்து விளக்கமளிக்கப்பட்டன. செவ்வாய்க்கிழமை காலை 10 மணி முதல் மாலை 6 மணி வரை நடைபெற்ற இந்தக் கண்காட்சியை பொதுமக்கள், பள்ளி, கல்லூரி மாணவ, மாணவிகள் பலா் பாா்வையிட்டனா். இந்த நிகழ்வில், மாவட்ட கூடுதல் காவல் கண்காணிப்பாளா், ஆய்வாளா்கள், உதவி ஆய்வாளா்கள், காவலா்கள் பலா் கலந்து கொண்டனா்.