தொண்டி அருகே மீனவர்களிடையே மோதல்

திருவாடானையை அடுத்த தொண்டி அருகே மீனவர்களிடையே ஞாயிற்றுக்கிழமை மோதல் ஏற்பட்டது. 
 தொண்டி அருகே உள்ள நம்புதாளையைச் சேர்ந்த மீனவர்கள் முத்துராஜா, பூவராஜன், செல்வம், காளிதாஸ் ஆகிய 4 பேரும் ஒரு படகில் மீன்பிடிக்க  ஞாயிற்றுக்கிழமை அதிகாலை கடலுக்குள் சென்றுள்ளனர்.
         அப்போது தொண்டி புதுக்குடியைச் சேர்ந்த இரண்டு படகில் வெடிவைத்து மீன் பிடித்து கொண்டிருந்துள்ளனர். இதனை நம்புதாளையைச் சேர்ந்த மீனவர்கள் தங்களது செல்லிடப்பேசியில் படம் பிடித்துள்ளனர். இதனால், புதுக்குடி மீனவர்கள், நம்புதாளை மீனவர்களை கடலில் வைத்து தாக்கியுள்ளனர்.
 இந்த சம்பவத்தால் நம்புதாளை, புதுக்குடி மீனவ கிராமத்தினரிடையே மோதல் ஏற்பட்டுள்ளது. மேலும், மீனவர் முத்துராஜா காயமடைந்துள்ளதாக மீனவர்கள் தெரிவித்தனர்.
 இதுகுறித்து முத்துராஜா அளித்த புகாரின்பேரில் கடலோர காவல் படையினர் வழக்குப்பதிந்து விசாரித்து வருகின்றனர். மேலும் மோதல் ஏற்படாதவாறு பாதுகாப்புப் பணியிலும் ஈடுபட்டுள்ளனர்.