முதியவர் வீட்டில் நகை, பணம் திருடியவர் கைது

முதுகுளத்தூரில் முதியவர் வீட்டில் நகை, பணத்தை திருடிய இளைஞரை போலீஸார் ஞாயிற்றுக்கிழமை கைது செய்தனர்.
    முதுகுளத்தூர் அரசு மருத்துவமனை 2-வது தெருவில் வசித்து வருபவர் மகாதேவன் (74). இவரது வீட்டிலிருந்து 16 பவுன் நகை, ரூ. 13 ஆயிரம் ரொக்கம், 2 ஏடிஎம் அட்டைகளை மர்ம நபர்கள் கடந்த 3-ஆம் தேதி இரவில் திருடிச் சென்றனர். இதுகுறித்து முதுகுளத்தூர் காவல் நிலையத்தில் மகாதேவன் புகார் அளித்திருந்தார்.
 அதன்பேரில் போலீஸார் வழக்குப்பதிந்து விசாரித்தனர். இதில், முதுகுளத்தூரைச் சேர்ந்த மனோகரன் மகன் காளீஸ்வரன் (30) தான் மகாதேவன் வீட்டில் திருடினார் என்பது தெரியவந்தது.
 அதன்பேரில், போலீஸார் வழக்குப்பதிந்து, காளீஸ்வரனை ஞாயிற்றுக்கிழமை கைது செய்தனர். மேலும், அவரிடமிருந்து ரூ.1 லட்சத்தை பறிமுதல் செய்தனர்.