கமுதி- முதுகுளத்தூா் பால வளைவில் உள்ள பள்ளத்தை சீரமைக்க வலியுறுத்தல்

கமுதி அருகே குடிநீா் குழாய் உடைப்பை சீரமைக்க தோண்டிய பள்ளத்தை பல மாதங்களாக மூடாததால் வாகன ஓட்டிகள் அச்சமடைந்திருப்பதாகவும், இதை உடனே சீரமைக்க வேண்டுமெனவும் கோரிக்கை விடுக்கப்பட்டது.

ராமநாதபுரம் மாவட்டம், கமுதி வட்டம், பேரையூா்-கமுதி சாலையில் கண்மாய் கரையோரத்தில் காவிரி கூட்டுக்குடிநீா் திட்டத்துக்காக பதிக்கப்பட்ட குழாய் உடைப்பை சீரமைக்க தோண்டப்பட்ட பள்ளம் பலமாதங்கள் ஆகியும் மூடப்படாமல் உள்ளது.

இதனால் கமுதியிலிருந்து பேரையூா் வழியாக முதுகுளத்தூா் செல்லும் முக்கிய சாலையில் அமைந்துள்ள பால வளைவில் செல்லும் வாகனங்கள் விலக்கிச் செல்லும் போது கண்மாய்க்குள் கவிழும் நிலை உள்ளது.

மேலும் இரவு நேரங்களில் வாகனங்களில் செல்வோா் விபத்து அச்சத்தில் சென்று வருகின்றனா். தற்போது பள்ளம் பெரிதாகி, சாலையில் அரிப்பு ஏற்பட்டு, சாலை சேதமடைந்து வருகிறது.

எனவே மாவட்ட நிா்வாகம் தலையிட்டு பள்ளத்தை சீரமைக்க நடவடிக்கை எடுக்க வேண்டும் என பொதுமக்கள் கோரிக்கை விடுத்தனா்.