திருப்புவனத்தில் மகளிர் குழு போராட்டம் வாபஸ்

திருப்புவனத்தில் மகளிர் குழுவினர் சார்பில் செவ்வாய்க்கிழமை நடைபெற இருந்த போராட்டம், சமாதான பேச்சுவார்த்தை மூலம் வாபஸ் பெறப்பட்டது.

திருப்புவனம் நகரில் குடிநீர் உள்ளிட்ட அடிப்படை வசதிகள் செய்து தரக் கோரி, ஒன்றிய மார்க்சிஸ்ட் கட்சி மற்றும் மகளிர் சுய உதவிக்குழுக்கள் இணைந்து பேரூராட்சி அலுவலகம் முன்பு செவ்வாய்க்கிழமை காலி குடம் ஏந்தி போராட்டம் நடத்தப் போவதாக அறிவித்திருந்தனர்.

இந்நிலையில் தாலுகா அலுவலக கூட்டரங்கத்தில் வட்டாட்சியர் ராமகிருஷ்ணன், திருப்புவனம் காவல் ஆய்வாளர்(பொறுப்பு)சாகுல்ஹமீது, பேரூராட்சி செயல் அலுவலர் ராஜகோபால் ஆகியோர் பேச்சுவார்த்தை நடத்தினர்.

கூட்டத்தில், பேரூராட்சியில் 16, 17 ஆகிய வார்டுகளின் மின்இணைப்பு நகர் மின் இணைப்புடன் இணைக்கப்படும். பழையூர் ஊரணி தூர்வாரி பாதுகாக்கப்படும்.

அனைத்து நகர் பகுதிகளுக்கும் குடிநீர் வழங்க நடவடிக்கை எடுக்கப்படும் என உறுதியளிக்கப்பட்டது. இதையடுத்து செவ்வாய்க்கிழமை நடக்க இருந்த போராட்டத்தை கைவிடுவதாக மார்க்சிஸ்ட் கட்சியினர் அறிவித்தனர்.