தேவகோட்டையில் தீ விபத்தில் 36 குடிசைகள் நாசம்

தேவகோட்டை அருகே குடிசை வீடுகள் மர்மமான முறையில் எரிந்து நாசமானது குறித்து போலீஸார் விசாரித்து வருகின்றனர்.

தேவகோட்டை இறகுசேரி பகுதியில் தொட்டிய நாயக்கர் சமுதாயத்தினர் குடிசைகள் அமைத்து தங்கியுள்ளனர். தேவகோட்டை மற்றும் சுற்றுவட்டார பகுதிகளில் நடைபெறும் திருவிழாக்களில் கடை நடத்தி வருகின்றனர். ஏர்வாடி  திருவிழாவில் கடை வைப்பதற்காக அனைவரும் சென்றுவிட்ட நிலையில் அவர்களது குடிசைகளில் திடீரென தீப்பற்றியது. தொடர்ந்து அடுத்தடுத்த வீடுகளுக்கும் தீ பரவியது. தகவல் அறிந்து தேவகோட்டை, காரைக்குடி, திருவாடானை தீயணைப்பு நிலையங்களில் இருந்து வந்த தீயணைப்பு படையினர் இரண்டு மணி நேரம் போராடி தீயை அணைத்தனர். விபத்தில் 36 வீடுகள் முற்றிலும் எறிந்து நாசமாயின. இதில் ரூ.20 லட்சம் மதிப்பிலான பொருள்கள் எரிந்து நாசமானதாகக் கூறப்படுகிறது. 

சம்பவ இடத்தை தேவகோட்டை கோட்டாட்சியர் சிதம்பரம், வட்டாட்சியர் கருணாகரன், காவல் துணைக்கண்காணிப்பாளர் கருப்பசாமி, ஆய்வாளர் ரமேஷ் ஆகியோர் பார்வையிட்டனர்.  

 தேவகோட்டை நகர்மன்றத் தலைவர் சுமித்ரா ரவிக்குமார், வீடுகளை இழந்த மக்களுக்கு ஆறுதல் கூறினார். விபத்துகான காரணம் குறித்து தேவகோட்டை போலீஸார் விசாரித்து வருகின்றனர்.