திருப்பத்தூர் ராஜகாளியம்மன்  கோயில் விழாவில் மஞ்சுவிரட்டு

திருப்பத்தூர் ராஜகாளியம்மன் கோயில் ஆடித்திருவிழாவை முன்னிட்டு ஞாயிற்றுக்கிழமை வடமாடு மஞ்சுவிரட்டு நடைபெற்றது.
இக் கோயிலில் ஆடி உற்சவத்தை முன்னிட்டு கடைசி வெள்ளியான ஆகஸ்ட் 10 இல் பால்குடம், பூக்குழி, பூத்தட்டு என ஆயிரத்திற்கும் மேற்பட்டோர் பங்கு கொண்ட திருவிழா நடைபெற்றது. இதைத் தொடர்ந்து ஞாயிற்றுக்கிழமை வடமாடு மஞ்சுவிரட்டு நடைபெற்றது. திருப்பத்தூர் குளம்கரை காத்த அய்யனார் கோயில் திடலில் நடைபெற்ற இந்த மஞ்சுவிரட்டில் 12 காளைகளும் 9 பேர் கொண்ட 12 குழுக்களும் ஈடுபட்டனர். இதில் 2 காளைகள் தவிர ஏனைய காளைகள் பிடிபட்டன. வெற்றி பெற்ற மாடுபிடி வீரர்களுக்கும், மாடுகளின் உரிமையாளர்களுக்கும் ரொக்கத் தொகை பரிசாக வழங்கப்பட்டது. மதுரை, திருச்சி, சிவகங்கை, காரைக்குடி, கண்டவராயன்பட்டி, உள்ளிட்ட ஊர்களிலிருந்து காளைகளும், திருப்பத்தூர், அதனைச் சுற்றியுள்ள ஊர்களிலிருந்து வீரர்களும் கலந்து கொண்டனர். இதை ஆயிரக்கணக்கான மக்கள் கண்டு களித்தனர். விழா ஏற்பாடுகளை செட்டியதெரு இளைஞர் குழுவினர் செய்திருந்தனர்.