கொலை வழக்கில் இளைஞா் கைது; மற்றொருவா் நீதிமன்றத்தில் சரண்

சிவகங்கை மாவட்டம், திருப்புவனம் அருகே நடைபெற்ற கொலை வழக்கில் இளைஞரை போலீஸாா் செவ்வாய்க்கிழமை கைது செய்தனா். மற்றொருவா் நீதிமன்றத்தில் சரணடைந்தாா்.

மதுரை பொன்னேரி தத்துவனம் புதூரைச் சோ்ந்த வண்ணம் பூசும் தொழிலாளி கணேசன் (32). இவா் கடந்த ஞாயிற்றுக்கிழமை திருப்புவனம் அருகேயுள்ள பசியாபுரம் கிராமத்தில் உள்ள தனது உறவினா் வீட்டு காதணி விழாவுக்கு வந்த போது, கொந்தகை கண்மாயில் கழுத்தில் கத்தியால் குத்தப்பட்டு கொலை செய்யப்பட்டுக் கிடந்தாா்.

இதுகுறித்து கீழடி போலீஸாா் வழக்குப் பதிந்து, பசியாபுரத்தைச் சோ்ந்த கதிரேசனைக் கைது செய்தனா்.

இந்த நிலையில், இந்த கொலை வழக்கு தொடா்பாக மதுரை சக்கிமங்கலத்தைச் சோ்ந்த மாணிக்கம் மகன் கண்ணன் (25) திருப்புவனம் குற்றவியல் நீதிமன்றத்தில் சரணடைந்தாா். மேலும், இதில் தொடா்புடைய பசியாபுரம் கிராமத்தைச் சோ்ந்த பொன்னையன் மகன் வினித்குமாரை (25) போலீஸாா் செவ்வாய்க்கிழமை கைது செய்தனா்.