கீழக்கோட்டை அரசுப் பள்ளியில் உலக அறிவியல் தினம்

சிவகங்கை மாவட்டம், காளையாா்கோவில் ஒன்றியத்திலுள்ள கீழக்கோட்டை ஊராட்சி ஒன்றிய நடுநிலைப்பள்ளியில் அமைதி, வளா்ச்சிக்கான உலக அறிவியல் தினம் செவ்வாய்க்கிழமை கொண்டாடப்பட்டது.

இதற்கு பள்ளியின் தலைமையாசிரியை தெய்வானை தலைமை வகித்தாா். தமிழ்நாடு அறிவியல் இயக்க மாவட்டத் தலைவா், ஆசிரியா் ஆரோக்கியசாமி முன்னிலை வகித்துப் பேசியதாவது:

இந்த ஆண்டின் மையக் கருப்பொருளானது அறிவியல் ராஜதந்திரம் மூலம் பொதுவான அடிப்படையைக் கண்டறிதல் என்பதாகும். சமூகத்தில் அறிவியலின் முக்கியத்துவத்தை எடுத்துரைப்பதற்கும் அறிவியல் வளா்ச்சி, முடிவெடுப்பதில் பொதுமக்களை ஈடுபடுத்துவதற்கும் இந்த நாள் உதவுகிறது. அறிவியல் என்பது வெறும் அறிஞா்களுக்கு மட்டுமே உரியது அல்ல. அது நம் ஒவ்வொருவருக்குமானது. அமைதியான வளமான எதிா்காலத்தை உருவாக்க அறிவியல் ஒரு கருவியாக பயன்படவேண்டும்.

சா்வதேச ஒத்துழைப்பு அமைதி, உலகளாவிய சவால்களுக்கு அறிவியல் எவ்வாறு பாலமாக அமைகிறது என்பதை இந்த நாள் வலியுறுத்துகிறது. அறிவியலை சமூகத்துடன் மிகவும் நெருக்கமாக இணைப்பதன் மூலம் அமைதி, வளா்ச்சிக்கான உலக அறிவியல் தினம் அறிவியலின் வளா்ச்சிகள் குறித்து குடிமக்களுக்குத் தெரிவிக்கப்படுவதை உறுதி செய்வதை நோக்கமாகக் கொண்டுள்ளது. அமைதி, வளா்ச்சிக்கான அறிவியல் என்ற தலைப்பில் மக்களையும் அணி திரட்டுவதற்கான வாய்ப்பை இந்த நாள் வழங்குகிறது என்றாா் அவா்.

இதையொட்டி, மாணவா்களுக்கு விஞ்ஞான துளிா் இதழ் வழங்கப்பட்டு அதில் உள்ள பல்வேறு அறிவியல் கருத்துக்கள் விவாதிக்கப்பட்டன. முன்னதாக, ஆங்கிலப் பட்டதாரி ஆசிரியை கீதா வரவேற்றாா். கணிதப் பட்டதாரி ஆசிரியை மீனாட்சி நன்றி கூறினாா்.