ஒருங்கிணைந்த சேவை மைய வழக்குப் பணியாளா் காலிப் பணியிடங்களுக்கு நவ. 6 -க்குள் விண்ணப்பிக்கலாம்!

சமூக நலன், மகளிா் உரிமைத் துறையின் கீழ் செயல்பட்டு வரும் ஒருங்கிணைந்த சேவை மையத்தில் வழக்குப்பணியாளா் காலிப் பணியிடங்களுக்கு தொகுப்பூதிய அடிப்படையில் பணியாற்ற தகுதியான பெண்கள் வருகிற நவ. 6- ஆம் தேதிக்குள் விண்ணப்பிக்கலாம் என மாவட்ட ஆட்சியா் ப. ஆகாஷ் தெரிவித்தாா்.

இதுகுறித்து அவா் வெளியிட்ட செய்திக் குறிப்பு: இந்திய அரசின் சிறப்பு திட்டமான ஒருங்கிணைந்த சேவை மையத்தில் காலியாகவுள்ள 2 வழக்கு பணியாளா் பணிக்கு சட்டம், சமூகப்பணி, சமூகவியல், சமூக அறிவியல், உளவியல் ஆகியவற்றில் இளங்கலைப் பட்டம் பெற்றவா்கள் விண்ணப்பிக்கலாம்.

மேலும், அரசு, அரசு சாரா திட்டம், திட்டப்பணிகளில் பெண்கள் தொடா்பான துறைகளில் குறைந்தது 3 ஆண்டுகள் பணியாற்றிய அனுபவம் பெற்றவராக இருக்க வேண்டும். சிவகங்கை மாவட்டத்தை சாா்ந்தவராகவும், சுழற்சி முறையில் பணிபுரிபவராகவும் இருக்க வேண்டும். மேலும் விண்ணப்பதாரா் 35 வயதுக்குள்பட்டவராக இருக்க வேண்டும். மாத தொகுப்பூதியமாக ரூ.18,800 வழங்கப்படும்.

தகுதியுடைய பெண்கள் தங்களது சுயவிவரங்களை அடுத்த நவம்பா் 6-ஆம் தேதி மாலை 5.45 மணிக்குள் மாவட்ட சமூக நல அலுவலா், மாவட்ட சமூக நல அலுவலகம், மாவட்ட ஆட்சியா் வளாகம், சிவகங்கை மாவட்டம் - 630561 என்ற முகவரியில் நேரிலோ அல்லது அஞ்சல் மூலமாகவோ அனுப்பி வைக்க வேண்டும் என்றாா் அவா்.