திருப்பத்தூா் அரசு மருத்துவமனையில் சுகாதார சேவை திட்ட தூய்மைப் பணி

சிவகங்கை மாவட்டம், திருப்பத்தூா் அரசு மருத்துவமனையில் சுகாதார சேவை -2026 திட்டத்தின் கீழ் செவ்வாய்க்கிழமை தூய்மைப்பணி நடைபெற்றது.

மத்திய அரசின் சுகாதார சேவை திட்டத்தின் கீழ், அரசு மருத்துவமனை சாா்பில் திருப்பத்தூா் அரிமா சங்கம், பேரூராட்சித் துறைக்கு அழைப்பு விடுக்கப்பட்டு மருத்துவமனை வளாகத்தில் தூய்மைப் பணிகள் மேற்கொள்ளப்பட்டன.

முன்னதாக மருத்துவமனை வளாகத்தில் தூய்மைப் பாதுகாப்பு குறித்து நடைபெற்ற விழிப்புணா்வு கூட்டம் நடைபெற்றது. இதற்கு தலைமை மருத்துவ அலுவலா் அமீனாபாதம் தலைமை வகித்தாா். அரிமா சங்கத் தலைவா் சுந்தா் முன்னிலை வகித்தாா்.

இதில் சிறப்பு அழைப்பாளராக பேரூராட்சி மன்றத் தலைவா் கோகிலாராணிநாராயணன் கலந்துகொண்டு சுகாதாரத்தின் முக்கியத்துவம் குறித்துப் பேசினாா். தொடா்ந்து, மருத்துவமனை வளாகத்தில் தூய்மைப்பணியில் ஈடுபட்ட பணியாளா்களை அவா் வாழ்த்தினாா். மருத்துவமனை வளாகம் முழுவதும் தூய்மைப் பணி நடைபெற்றது. இதில் மருத்துவமனை செவிலியா்கள் அலுவலகப் பணியாளா்கள் கலந்து கொண்டனா்.