1655 மாணவர்களுக்கு விலையில்லா மடிக்கணினி வழங்கல்

சிவகாசி பகுதியில் உள்ள 13 பள்ளிகளைச் சேர்ந்த 1655 மாணவ மாணவிகளுக்கு தமிழக அரசின் விலையில்லா மடிக்கணினியை சனிக்கிழமை செய்தி விளம்பரம் மற்றும் சிறப்புத்திட்டங்கள் செயலாக்கத்துறை அமைச்சர் கே.டி.ராஜேந்திரபாலாஜி வழங்கினார்.

திருத்தங்கல் அரசு பெண்கள் பள்ளி வளாகத்தில் நடைபெற்ற இந்த நிகழ்ச்சிக்கு விருதுநகர் மாவட்ட முதன்மை கல்வி அலுவலர் புகழேந்தி தலைமை வகித்தார்.

விருதுநகர் மக்களவைத் தொகுதி உறுப்பினர் டி.ராதாகிருஷ்ணன், திருத்தங்கல் நகர்மன்றத் தலைவி தனலட்சுமி கணேசன், துணைத் தலைவர் பொ.சக்திவேல் ஆகியோர் முன்னிலை வகித்தனர்.மாவட்ட கல்வி அலுவலர் பொ.ராமச்சந்திரன் வரவேற்றார்.திருத்தங்கல் அரசு பெண்கள் மேல்நிலைப்பள்ளி, சீ.ரா.அரசு மேல்நிலைப்பள்ளி, பூவநாதபுரம் அரசு மேல்நிலைப்பள்ளி, சிவகாசி நகராட்சி மேல்நிலைப்பள்ளி உள்ளிட்ட 13 பள்ளிகளைச் சேர்ந்த 1655 மாணவ, மாணவிகளுக்கு அமைச்சர் கே.டி.ராஜேந்திரபாலாஜி விலையில்லா மடிக்கணினிகளை வழங்கி பேசியதாவது:

 விருதுநகர் மாவட்டத்தில் கடந்த நான்கு ஆண்டுகளில் ரூ 92.44 கோடி மதிப்பீட்டில் 67676 மாணவ மாணவிகளுக்கு விலையில்லா மடிக்கணினி வழங்கப்பட்டுள்ளது. 81757 மாணவ மாணவிகளுக்கு ரூ 26.11கோடி மதிப்பீட்டில் விலையில்லா   மிதிவண்டிகளும் வழங்கப்பட்டுள்ளது. மாணவர்கள் இந்த வாய்பினை பயன்படுத்தி வாழ்கையில் முன்னேற வேண்டும் என்றார் அமைச்சர்.

அதிமுக மாவட்ட வழக்குரைஞர் பிரிவு இணைச் செயலாளர் கணேசன், ஒன்றிய செயலாளர் கருப்பசாமி உள்ளிட்டோர் கலந்து கொண்டனர்.