லஞ்சம் வாங்கிய சமூக நலத் திட்ட விரிவாக்க அலுவலா் மீது வழக்கு

ராஜபாளையத்தில் லஞ்சம் வாங்கிய புகாரின் பேரில், பணியிடை நீக்கம் செய்யப்பட்ட சமூக நலத் திட்ட விரிவாக்க அலுவலா் மீது ஊழல் தடுப்புப் பிரிவு போலீஸாா் வழக்குப் பதிவு செய்தனா்.

விருதுநகா் மாவட்டம், ஸ்ரீவில்லிபுத்தூா் அருகேயுள்ள இடையன்குளம் கிராமத்தைச் சோ்ந்தவா் மேக்தாமேரி நவரோஜினி. இவா் கடந்த 2024-ஆம் ஆண்டு ராஜபாளையம் ஊராட்சி ஒன்றிய அலுவலகத்தில் சமூக நலத் திட்ட விரிவாக்க அலுவலராகப் பணிபுரிந்தாா். அப்போது, சமூக நலத் திட்டத்தின் கீழ் நல உதவிகளைப் பெற விண்ணப்பிக்க வரும் பயனாளிகளிடம் இவா் லஞ்சம் பெறுவது போன்ற விடியோ சமூக வலைதளங்களில் வெளியானது.

இதுகுறித்து மாவட்ட சமூக நல அலுவலா் விசாரணை நடத்தி, மேத்தா மேரி நவரோஜினியை பணியிடை நீக்கம் செய்து உத்தரவிட்டாா்.

இதுகுறித்து ஊழல் தடுப்பு, கண்காணிப்புப் பிரிவு போலீஸாா் நடத்திய விசாரணையில், மேத்தா மேரி நவரோஜினி, விண்ணப்பங்களைப் பதிவேற்றம் செய்ய பயனாளிகளிடம் பணம் பெற்றது தெரியவந்தது. இதையடுத்து, அவா் மீது ஊழல் தடுப்புச் சட்டத்தின் கீழ் போலீஸாா் வழக்குப் பதிவு செய்து விசாரித்து வருகின்றனா்.