குடிபோதையில் வீடு புகுந்து தாக்கிய 2 பேர் கைது

கீழ்வேளூர் அருகே குடிபோதையில் வீட்டுக்குள் புகுந்து தாக்கிய இருவர் வெள்ளிக்கிழமை கைது செய்யப்பட்டனர்.

இதுகுறித்து போலீஸ் தரப்பில் கூறப்படுவது:

கீழ்வேளூர், தேவூர், குயவர் தெருவைச் சேர்ந்த மாரியப்பன் மகன் விஜயகுமார் (58). வியாழக்கிழமை இரவு இவரது வீட்டு வாசல் முன்பு அதே பகுதியைச் சேர்ந்த சிலர் மதுபோதையில் சத்தம் போட்டபடி இருந்தனராம். இதுகுறித்து அவர்களிடம் விஜயகுமார் கேட்டபோது, தகராறு ஏற்பட்டுள்ளது.

இதையடுத்து மதுபோதையில் இருந்தவர்கள் விஜயகுமாரின் வீட்டுக்குள் அத்துமீறி நுழைந்து கையாலும், அரிவாளாலும் தாக்கியுள்ளனர்.

பின்னர் வாசலில் இருந்த படிக்கட்டு மற்றும் அதில் இருந்த பொருள்களை சேதப்படுத்தி உள்ளனர்.

இதையடுத்து விஜயகுமார் அளித்த புகாரின் பேரில் கீழ்வேளூர் போலீஸார், அதே பகுதியைச் சேர்ந்த ராஜாங்கம் மகன் கண்ணன் (50), ரங்கசாமி மகன் பழனிவேல் (30) உள்ளிட்ட 5 பேர் மீது வழக்கு பதிந்து கண்ணன், பழனிவேல் ஆகியோரை கைது செய்தனர்.