சீர்காழியில் பெ.தி.க.வினர் ஆர்ப்பாட்டம்

தமிழகத்துக்குரிய காவிரி நீரை தராத கர்நாடக அரசை கண்டித்து, சீர்காழியில் தந்தை பெரியார் திராவிட கழகத்தினர் சனிக்கிழமை பேரணி, ஆர்ப்பாட்டத்தில் ஈடுபட்டனர்.

நடுவர் மன்ற இறுதித் தீர்ப்பின்படி, தண்ணீர் கொடுக்க மறுக்கும் கர்நாடக அரசை கண்டித்தும், அம்மாநிலத்திற்கு நெய்வேலியிலிருந்து மின்சாரத்தை மத்திய அரசு அனுப்ப கூடாது, காவிரி படுகையிலிருந்து பெட்ரோலியம் மற்றும் மீத்தேன் வாயு எடுக்கக் கூடாது என்பது உள்ளிட்ட கோரிக்கைகளை வலியுறுத்தி இந்த ஆர்ப்பாட்டம் நடைபெற்றது.

முன்னதாக, பழைய பேருந்து நிலையம் பகுதியிலிருந்து தந்தை பெரியார் திராவிட கழகத்தினர் மாவட்டத் தலைவர் இரா. பரசுராமன் தலைமையில் பேரணியாக அஞ்சல் அலுவலகம் சென்றனர். அங்கு பெரியார் மாணவர் கழக மாவட்ட செயலாளர் அருண்பாபு, நகர செயலாளர் பிரவீண்ராஜ், ஒன்றிய செயலாளர் செந்தில்குமார் ஆகியோர் முன்னிலையில் ஆர்ப்பாட்டம் நடைபெற்றது. மாவட்டச் செயலாளர் ப.வ. பெரியார்செல்வம் பங்கேற்று, கர்நாடக அரசுக்கு எதிராக முழக்கங்கள் எழுப்பினார். பொறுப்பாளர்கள் பாக்கியராஜ், சிவராஜ், தமிழ் தேசிய பேரியக்கம் நடராஜன், மனித நேய மக்கள் கட்சி ஒ.எம்.ஏ.முசாஹூதீன் உள்ளிட்ட பலர் பங்கேற்றனர்.