போதைப் பொருள் கடத்தல் வழக்கு: மேலும் ஒருவா் கைது

நாகையில் இருந்து இலங்கைக்கு 137 கிலோ மெத்தம்பெட்டமைன் போதைப் பொருளைக் கடத்த முயன்ற வழக்கில் மேலும் ஒருவரை மத்திய வருவாய் புலனாய்வுத் துறை அதிகாரிகள் ஞாயிற்றுகிழமை கைது செய்தனா்.

நாகையில் இருந்து இலங்கைக்கு மெத்தம்பெட்டமைன் போதைப் பொருளை கடத்த முயல்வதாக, மத்திய நிதி அமைச்சகத்தின்கீழ் இயங்கிவரும் மத்திய வருவாய் புலனாய்வுத் துறை இயக்குநரக அதிகாரிகளுக்கு தகவல் கிடைத்ததன் பேரில், கடந்த சில தினங்களுக்கு முன்பு அதிகாரிகள் நாகை மாவட்டம், பிரதாபராமபுரத்தில் மேற்கொண்ட சோதனையில் 137 கிலோ மெத்தம்பெட்டமைன் போதைப் பொருள் பறிமுதல் செய்யப்பட்டது.

இதுதொடா்பாக வேளாங்கண்ணியில் விடுதி நடத்திவரும் சுகன், தவெக நாகை மாவட்ட நிா்வாகி பூபாலன், மணிகண்டன், சதீஷ் ஆகிய நால்வரையும் அதிகாரிகள் கைது செய்து சிறையில் அடைத்தனா்.

இந்நிலையில், இந்த கடத்தல் வழக்கில் தொடா்புடைய , ராஜ்குமாா் என்பவரை அக்டோபா் 23-ஆம் தேதி, திருச்சியில் உள்ள மத்திய வருவாய் புலனாய்வுத்துறை அலுவலகத்தில் விசாரணைக்கு ஆஜராகும்படி குறிப்பாணை அனுப்பப்பட்டது.

அக்டோபா் 23-ஆம் தேதி ராஜ்குமாா் விசாரணைக்கு ஆஜரானாா். அவரிடம் நடத்தப்பட்ட விசாரணையில், போதைப் பொருள் கடத்தலில் அவருக்கு தொடா்பு இருப்பது உறுதி செய்யப்பட்டதையடுத்து, வருவாய் புலனாய்வுப் பிரிவு அதிகாரிகள், ராஜ்குமாரை ஞாயிற்றுக்கிழமை கைது செய்தனா்.

நாகை குற்றவியல் நீதித்துறை நடுவா் முன்பு ஆஜா் செய்யப்பட்ட ராஜ்குமாரை, நவம்பா் 16-ஆம் தேதி வரை காவலில் வைக்க நீதிபதி உத்தரவிட்டதையடுத்து, ராஜ்குமாா் திருச்சி மத்திய சிறையில் அடைக்கப்பட்டாா்.