திருவாரூரில் போலீஸாரை கண்டித்து திமுகவினர் ஆர்ப்பாட்டம்

திருவாரூரில் காவல் துறையினரின் பாரபட்ச நடவடிக்கைகளை கண்டித்து, திமுகவின் ஆதிதிராவிடர் நலக் குழு சார்பில் திங்கள்கிழமை ஆர்ப்பாட்டம் நடைபெற்றது.

கூத்தாநல்லூர் அருகே திருராமேஸ்வரத்தில் அண்மையில் இருதரப்பினரிடையே நிகழ்ந்த தகராறு தொடர்பாக இருதரப்பு மீதும் வழக்குப் பதிவு செய்யப்பட்டது. இதில் திமுகவைச் சேர்ந்தவர்கள் மீது கடுமையான சட்டப் பிரிவின் கீழ் வழக்குப் பதிவு செய்யப்பட்டுள்ளதாம். இதில் ஆதிதிராவிடர் சமூகத்தைச் சேர்ந்த ஒருவர் மீது சாதி வன்கொடுமை வழக்குப் பதிவு செய்யப்பட்டதாம்.

இதற்கு கண்டனம் தெரிவிக்கும் வகையிலும், காவல்துறையினரின் பொய் வழக்குகளை திரும்பப் பெற வேண்டுமென்றக் கோரிக்கையை வலியுறுத்தியும் இந்த ஆர்ப்பாட்டம் நடைபெற்றது.

கட்சியின் மாவட்டச் செயலர் கே. கலைவாணன் தலைமையில் நடைபெற்ற ஆர்ப்பாட்டத்தில், ஆதிதிராவிடர் நலப்பிரிவு மாவட்டச் செயலர் பிரபாகரன், மாவட்ட இளைஞரணி துணை அமைப்பாளர் ரஜினிசின்னா, அமைப்பாளர் இளையராஜா, பகுத்தறிவு கலை இலக்கியக்கழக மாவட்ட அமைப்பாளர் கருணாநிதி, திருவாரூர் நகரச் செயலர் எஸ். பிரகாஷ் மற்றும் நிர்வாகிகள் தாஜூதீன் உள்ளிட்டோர் பங்கேற்றனர்.