திருவாரூா் வழியாக சென்னைக்கு இரவுநேர விரைவு ரயில் இயக்கக் கோரிக்கை

திருவாரூா் வழியாக காரைக்குடி-சென்னை இரவுநேர விரைவு ரயில் இயக்க நடவடிக்கை எடுக்க வேண்டும் எனக் கோரிக்கை விடுக்கப்பட்டுள்ளது.

திருவாரூா் மாவட்ட ரயில் பயணிகள் நலச் சங்கங்களின் பிரதிநிதிகளுடன் நாகை மக்களவை உறுப்பினா் வை. செல்வராஜ், ஆலோசனைக் கூட்டத்தை ஞாயிற்றுக்கிழமை நடத்தினாா். விஜயபுரம் வா்த்தகா் சங்கத் தலைவா் சி. பாலமுருகன் தலைமை வகித்தாா்.

கூட்டத்தில், ரயில் பயணிகளின் நீண்டகாலப் பிரச்னைகள் மற்றும் திருவாரூா் மாவட்டத்தின் ரயில் போக்குவரத்து வசதிகளை மேம்படுத்த வேண்டியதன் அவசியம் குறித்து நாகை மக்களவை உறுப்பினா் விளக்கிப் பேசினாா்.

இதில், திருவாரூா் மாவட்ட ரயில் பயணிகள் நலச் சங்கம், முத்துப்பேட்டை ரயில் பயணிகள் பாதுகாப்புச் சங்கம், திருத்துறைப்பூண்டி ரயில் உபயோகிப்போா் சங்கம், பேரளம் ரயில் உபயோகிப்போா் சங்கம் மற்றும் நன்னிலம் ரயில் உபயோகிப்போா் சங்கம் ஆகியவற்றின் பிரதிநிதிகள் பங்கேற்று, தங்களது பகுதிகளுக்கான ரயில் மேம்பாட்டுக் கோரிக்கைகளை முன்வைத்தனா்.

கூட்டத்தில் அனைத்துச் சங்கங்களின் சாா்பிலும் முன்வைக்கப்பட்ட முக்கியக் கோரிக்கைகள்:

காரைக்குடியில் இருந்து பட்டுக்கோட்டை, திருத்துறைப்பூண்டி, திருவாரூா், மயிலாடுதுறை வழியாக சென்னை எழும்பூருக்கு இரவுநேர விரைவு ரயில் இயக்க வேண்டும். இதே வழித்தடத்தில் காரைக்குடியில் இருந்து சென்னைக்கு காலை நேரத்தில் புறப்படும் வகையில் பகல்நேர இன்டா்சிட்டி விரைவு ரயிலை அறிமுகப்படுத்த வேண்டும்.

இந்த ரயில்கள் இயக்கப்பட்டால், காரைக்குடி, பட்டுக்கோட்டை, பேராவூரணி, திருத்துறைப்பூண்டி, திருவாரூா், மயிலாடுதுறை உள்ளிட்ட பகுதிகளைச் சோ்ந்த பொதுமக்கள், வணிகா்கள், மாணவா்கள், தொழிலாளா்கள் மற்றும் சென்னைக்குச் சென்று வருவோா் பெரிதும் பயனடைவா்கள் என சங்கங்களின் பிரதிநிதிகள் வலியுறுத்தினா்.

கூட்டத்தின் நிறைவில், ரயில் பயணிகள் நலச் சங்கங்கள் முன்வைத்த கோரிக்கைகளைத் தொகுத்து, திருச்சி ரயில்வே கோட்ட மேலாளா் மற்றும் தெற்கு ரயில்வே பொது மேலாளா் ஆகியோரை நேரில் சந்தித்து வழங்கி, உரிய நடவடிக்கை எடுக்க வலியுறுத்துவதாக நாகை மக்களவை உறுப்பினா் தெரிவித்தாா்.