டெங்குவைக் கட்டுப்படுத்துவதில் தில்லி அரசு தோல்வி: பாஜக குற்றச்சாட்டு

டெங்கு நோயை கட்டுப்படுத்துவதில் "ஆம் ஆத்மி' அரசு தோல்வியடைந்து விட்டது என்று தில்லி மாநில பாஜக தலைவர் சதீஷ் உபாத்யாய் குற்றம்சாட்டினார்.

இது தொடர்பாக திங்கள்கிழமை அவர் செய்தியாளர்களிடம் கூறியதாவது:

தில்லியில் டெங்கு நோய் பரவலைத் தடுக்கவும், நோயைக் கட்டுப்படுத்துவதிலும் தில்லி அரசும், அதன் சுகாதாரத் துறை அமைச்சர் சத்யேந்திர ஜெயினும் முற்றிலும் தோல்வியடைந்துவிட்டனர். டெங்கு நோயாளிகளுக்கு உரிய மருத்துவ வசதிகளும் அளிக்கப்படுவதில்லை. தில்லி மருத்துவமனைகளில் டெங்கு பாதித்த நோயாளிகளுக்கான போதிய படுக்கைகள் இருப்பில் இல்லை.

ஜனக்புரியிலும், தாஹிர்பூரிலும் 1000 படுக்கைகள் வசதி கொண்ட இரு பெரிய மருத்துவமனைகள் உள்ளன. ஆனால், ஆட்சிக்கு வந்து 7 மாதங்களாகியும் அவற்றைச் செயல்படுத்துவதற்கு அரசு ஆர்வம் காட்டவில்லை.

அதேபோன்று, தில்லி அரசால் தொடங்கப்பட்ட "மொஹல்லா கிளினிக்' திட்டத்தில் வாங்கப்பட்ட 150 அவசரகால மருத்துவ வாகனங்கள் பயன்படுத்தப்படாமல் துருப்பிடித்து வருகின்றன. அரசு இதுவரை ஒரு கிளினிக்கை மட்டுமே திறந்துள்ளது.

தில்லி சட்டப்பேரவை எதிர்க்கட்சித் தலைவர் விஜேந்தர் குப்தா கூறுகையில், "சுகாதாரத் துறைக்கு 1.5 தடவை அதிகமாக நிதி ஒதுக்கியதாக தில்லி அரசு அறிவித்தது. ஆனால், தில்லியில் சுகாதாரப் பணிகள் தொடர்ந்து மோசமாகி வருகின்றன. டெங்கு நோய் தடுப்பு விஷயத்தில் மருத்துவமனைகள் தில்லி அரசும், நிர்வாகமும் மேற்கொள்ளவில்லை எனத் தெரிகிறது.

டெங்கு பரவலைக் கட்டுப்படுத்தும் வகையில் தில்லியின் மூன்று மாநகராட்சி மேயர்களும் சிறப்பு சுகாதார இயக்கத்தை மேற்கொள்ளுமாறு கேட்டுக்கொள்ளப்பட்டுள்ளனர்' என்றார்.