ஒரே குடும்பத்தில் 3 பேர் படுகொலை: தில்லியில் அதிர்ச்சி சம்பவம்

தில்லியின் சராய் ரோஹில்லா பகுதியில் வயதான தம்பதி, அவர்களது மகன் என 3 பேர் கழுத்து அறுத்துக் கொலை செய்யப்பட்ட சம்பவம், பெரும் அதிர்ச்சியை ஏற்படுத்தியுள்ளது.

இதுதொடர்பாக வடக்கு தில்லி காவல் துறை துணை ஆணையர் மதூர் வர்மா கூறியதாவது: சராய் ரோஹில்லா பகுதியிலுள்ள ஒரு காலனியில், தங்களது 30 வயது மகனுடன் சந்து லால் (70) - குல்லு தேவி (65) தம்பதியர் வசித்து வந்தனர். இந்நிலையில், கடந்த புதன்கிழமை காலையில் இருந்து அவர்களது வீடு பூட்டியே கிடந்தது. இதனால்,  சந்தேகமடைந்த பக்கத்து வீட்டினர், போலீஸாருக்கு வெள்ளிக்கிழமை தகவல் கொடுத்தனர்.

இதைத் தொடர்ந்து, வீட்டின் பூட்டை உடைத்து போலீஸார் உள்ளே சென்றனர். அங்கு பொருள்கள் சிதறிக் கிடந்தன. மேலும், சந்து லால், குல்லு தேவி ஆகியோர் கழுத்து அறுத்துக் கொலை செய்யப்பட்டு கிடந்தனர். மற்றொரு அறையில் கை, கால்கள் கட்டப்பட்ட நிலையில், அவர்களது மகனும் கழுத்து அறுத்துக் கொல்லப்பட்டுக் கிடந்தார்.

 இதையடுத்து, மூன்று சடலங்களையும் மீட்ட போலீஸார், அவற்றை பிரேத பரிசோதனைக்கு அனுப்பி வைத்தனர். தம்பதியருக்கு நன்றாக பழக்கமானவர்களே, இச்சம்பவத்தில் ஈடுபட்டிருக்கலாம் என சந்தேகிக்கப்படுகிறது. 3 படுகொலைகளை அரங்கேற்றிவிட்டு, கொலையாளிகள் வீட்டை வெளிப்புறமாக பூட்டி விட்டுச் சென்றுள்ளனர். கொலைக்கான காரணம், கொலையாளிகள் குறித்து தீவிர விசாரணை நடைபெற்று வருகிறது என்றார் மதூர் வர்மா.

 6 பேர் சிக்கினர்: இதனிடையே, இச்சம்பவம் தொடர்பாக சந்தேகத்தின்பேரில் 6 பேரை பிடித்து போலீஸார் விசாரித்து வருகின்றனர். இவர்களில் 2 பேர், சந்துலால் வீட்டில் வாடகைக்கு இருந்தவர்கள். கடந்த வாரம்தான் வீட்டை காலி செய்து சென்றுள்ளனர். மற்றொருவர், சந்து லாலின் உறவினர் ஆவார் என போலீஸார் தெரிவித்தனர்.