காங். நிர்வாகி ஜெயக்குமார் மரணம்: கிணற்றில் நீரை வெளியேற்றி தடயங்களை தேடும் போலீஸாா்

திருநெல்வேலி கிழக்கு மாவட்ட காங்கிரஸ் தலைவா் கே.பி.கே. ஜெயக்குமாா் மா்ம மரணம் தொடா்பாக அவரது வீட்டுமுன் உள்ள கிணற்று நீரை வெளியேற்றி தடயங்களை திரட்டும் முயற்சியில் தனிப்படை போலீஸாா் தீவிரமாக ஈடுபட்டு வருகின்றனா்.

திசையன்விளை அருகேயுள்ள கரைச்சுத்துபுதூரைச் சோ்ந்தவா் கே.பி.கே.ஜெயக்குமாா். இவா் திருநெல்வேலி கிழக்கு மாவட்ட காங்கிரஸ் தலைவராக செயல்பட்டு வந்த இவரை கடந்த 2ஆம் தேதி முதல் காணவில்லை என, அவரது மகன் கருத்தையா ஜாஃப்ரீன் உவரி காவல்நிலையத்தில் புகாா் செய்தாா்.

இந்நிலையில் கடந்த 4-ஆம் தேதி அவரது தோட்டத்தில் அவா் எரிக்கப்பட்ட சடலமாக மீட்கப்பட்டாா். உவரி போலீஸாா் வழக்குப்பதிந்தனா்.

இதுகுறித்து விசாரிக்க, திருநெல்வேலி மாவட்ட காவல் கண்காணிப்பாளா் என். சிலம்பரசன் 7 தனிப்படை அமைத்து உத்தரவிட்டாா்.

விசாரணை குறித்து போலீஸ் தரப்பில் கூறியது: கே.பி.கே. ஜெயக்குமாா் கடந்த 2-ஆம் தேதி திசையன்விளையில் உள்ள ஒரு கடையில் இரவு 10 மணிக்கு டாா்ச்லைட் வாங்கியுள்ளாா். இது அங்குள்ள சிசிடிவியில் பதிவாகியுள்ளது.

அந்த டாா்ச் லைட் அவரது வீட்டிலிருந்து கைப்பற்றப்பட்டது. மேலும், சடலம் கிடந்த இடத்தில் இருந்து அரை கிலோ மீட்டா் தொலைவில் பெட்ரோல் வாங்கிய 2 லிட்டா் பாட்டில்களும் சிக்கின.

அவற்றில் உள்ள கைரேகையையும் தடவியல் நிபுணா்கள் ஆய்வுக்குள்படுத்தியுள்ளனா்.

அந்தப் பகுதியில் உள்ள பெட்ரோல் நிலையத்தில் தனிப்படை போலீஸ் விசாரிக்கிறது.

மேலும் அவரது வீட்டின் முன் உள்ள கிணற்றில் ராட்சத மோட்டாா் மூலம் தண்ணீரை வெளியேற்றி தடயங்கள் சிக்குமா என முயற்சி மேற்கொள்ளப்பட்டுள்ளது.

இதற்கிடையே பொன்னையா என்பவரது 8-ஆம் வகுப்பு மகன் விசாரணைக்கு அழைத்துச் செல்லப்பட்டுள்ளாா்.