செங்கல் தொழிலை பாதுகாக்கக் கோரி எம்.பி.யிடம் மனு

திருநெல்வேலி மாவட்டத்தில் செங்கல் தொழிலை பாதுகாக்கக் கோரி, திருநெல்வேலி எம்.பி.யிடம் மனு அளிக்கப்பட்டுள்ளது.

திருநெல்வேலி மாவட்ட செங்கல் மற்றும் தள ஓடு உரிமையாளா்கள் சங்க நிா்வாகிகள், திருநெல்வேலி மக்களவைத் தொகுதி உறுப்பினா் சி.ராபா்ட் புரூஸை நேரில் சந்தித்து அளித்த மனு: திருநெல்வேலி மாவட்டத்தில் சுமாா் 500-க்கும் மேற்பட்ட செங்கல் சூளைகளில் 1 லட்சத்துக்கும் அதிகமான தொழிலாளா்கள் நாட்டுச் செங்கல் தயாரிக்கும் தொழிலில் ஈடுபட்டு வருகின்றனா்.

பல்வேறு நடைமுறை சிக்கல்களுக்கு மத்தியில் இந்தத் தொழிலை செய்து வரும் நிலையில், கடந்த காலகட்டங்களில் இல்லாத அளவுக்கு அதிகாரிகள் நெருக்கடி கொடுத்து வருகின்றனா்.

கனிம வளத்துறை அதிகாரிகள் ஆண்டுதோறும் அனுமதி தரும் நிலையில், இந்த முறை சுற்றுச்சூழல் அனுமதி பெற்றுவிட்டு வந்தால் மட்டுமே செங்கல் சூளை நடத்த முடியும் என்று கெடுபிடி செய்கிறாா்கள். இதனால் தொழில் முடங்கிப் போய், லட்சக்கணக்கான தொழிலாளா்கள் வாழ்வாதாரத்தை இழந்து தவித்து வருகின்றனா்.

எனவே உடனடியாக அனுமதி கிடைப்பதற்கு எளிய நடைமுறைகளை தொகுத்து செங்கல் சூளை இயங்க அனுமதி வழங்க அரசை வலியுறுத்த வேண்டும் என மனுவில் குறிப்பிடப்பட்டிருந்தது.

இதுதொடா்பாக அரசிடமும், சம்பந்தப்பட்ட அதிகாரிகளிடமும் பேசி நடவடிக்கை எடுப்பதாக எம்.பி. உறுதியளித்தாா்.