ஆரல்வாய்மொழி முப்பந்தல் இசக்கியம்மன் கோயில் கொடை விழா

ஆரல்வாய்மொழி முப்பந்தல் (கிழக்கு) அருள்மிகு இசக்கியம்மன் கோயில் கொடை விழா திங்கள்கிழமை (ஆக.13) தொடங்கி இரண்டு நாள்கள் நடைபெறுகிறது.
நாகர்கோவில் - காவல்கிணறு தேசிய நெடுஞ்சாலையில் அமைந்துள்ள இக்கோயில் கொடை விழா, திங்கள்கிழமை காலை 7 மணிக்கு சிறப்பு பூஜை, சிறப்பு அலங்கார தீபாராதனையுடன் தொடங்குகிறது. 
தொடர்ந்து நண்பகல் 12 மணிக்கு சிறப்பு அலங்கார தீபாராதனை, மாலை 3 மணிக்கு அம்மனுக்கும், சுவாமிக்கும் மாகாப்பு சாத்தும் நிகழ்ச்சி, மாலை 6 மணிக்கு திருவிளக்கு பூஜை, இரவு 7 மணிக்கு சிறப்பு மாகாப்பு,  தீபாராதனை ஆகியவை நடைபெறுகின்றன. 
இரண்டாம் நாளான செவ்வாய்க்கிழமை காலை 5 மணிக்கு மகா கணபதி ஹோமம் , காலை 7 மணிக்கு  பேருந்து நிறுத்தம் அருகே உள்ள மாரியம்மன் கோயிலிலிருந்து பக்தர்கள் அபிஷேக குடங்கள் எடுத்து ஊர்வலம் வரும் நிகழ்ச்சி ஆகியவை நடைபெறுகின்றன. காலை 7.30 மணிக்கு சிறப்பு அபிஷேகம், கும்பாபிஷேகம் நடைபெறுகிறது.
பிற்பகல் 1 மணிக்கு சிறப்பு அலங்கார பூஜை, உச்சிகால பூஜை, பிற்பகல் 2 மணிக்கு அன்னதானம் ஆகியவை நடைபெறுகின்றன. மாலை 3 மணிக்கு சமயச் சொற்பொழிவு,  5 மணிக்கு பக்தி இசை தெம்மாங்கு பாடல்கள், இரவு 7 மணிக்கு இன்னிசை நிகழ்ச்சி, தொடர்ந்து அம்மனுக்கு சிறப்பு அலங்கார தீபாராதனை, இரவு 11 மணிக்கு பூப்படப்பு சிறப்பு தீபாராதனை, நள்ளிரவு 12 மணிக்கு அம்பாள்-சுவாமிக்கு சிறப்பு வழிபாடு நடைபெறுகிறது. 
தொடர்ந்து விரதம் இருக்கும் பக்தர்கள் பூக்குழி இறங்கும் நிகழ்ச்சி நடைபெறுகிறது. 
விழா ஏற்பாடுகளை உதவி ஆணையர் ரத்தினவேல் பாண்டியன், கோயில் செயல் அலுவலர் கிருஷ்ணமூர்த்தி உள்ளிட்டோர் செய்து வருகின்றனர்.