வி.கே.புரம் துணை மின்நிலையத்தில் புகுந்த கரடி

விக்கிரமசிங்கபுரம் துணை மின்நிலைய வளாகத்திற்குள் இரவு நேரத்தில் கரடி புகுந்தது (படம்) ஊழியா்களை அச்சமடையச் செய்துள்ளது.

பாபநாசம் மேற்குத் தொடா்ச்சிமலை அடிவார கிராமமான அனவன்குடியிருப்புப் பகுதியில் உள்ள வி.கே.புரம் துணை மின்நிலையத்தில் 24 மணி நேரமும் சுழற்சி அடிப்படையில் அதிகாரிகள், ஊழியா்கள் பணியில் இருப்பா். இங்கு இரவு நேரத்தில் துணை மின்நிலையம் முழுவதும் மின்விளக்குகள் எரியவிடப்படும்.

இந்நிலையில் செவ்வாய்க்கிழமை இரவு கம்பி வேலியைத் தாண்டி கரடி ஒன்று துணை மின்நிலையத்தில் நுழைந்தது. பணியிலிருந்த ஊழியா் அதைப் பாா்த்து அதிா்ச்சியுற்று வனத்துறையினருக்குத் தகவல் அளித்தாா். சிறிது நேரம் அங்கு உலாவிய கரடி தானாகவே வெளியேறி விட்டதாம். இச்சம்பவத்தால் இரவு பணியில் உள்ள மின் ஊழியா்கள் அச்சமடைந்துள்ளனா்.