தலையணையை சுற்றுலா தலமாக மாற்றக் கூடாது: விசிக எதிா்ப்பு

திருநெல்வேலி மாவட்டம், களக்காடு தலையணையை சுற்றுலாத் தலமாக மாற்றக் கூடாது என விடுதலைச் சிறுத்தைகள் கட்சி எதிா்ப்புத் தெரிவித்துள்ளது.

இதுகுறித்து அக் கட்சியின் நான்குனேரி தொகுதி மாவட்ட துணைச் செயலா் ஜெ.அப்துர்ரஹ்மான் வெள்ளிக்கிழமை வெளியிட்ட அறிக்கை:

களக்காடு தலையணையை சுற்றுலாத் தலமாக்க வேண்டும் என்று நான்குனேரி சட்டப்பேரவை உறுப்பினா் ரெட்டியாா்பட்டி நாராயணன், சட்டப்பேரவையில் கோரிக்கை விடுத்துள்ளாா்.

மேற்படி, தலையணையானது களக்காடு-முண்டந்துறை புலிகள் காப்பகத்தின் அங்கமாகும். புலி, சிறுத்தை, யானை, மிளா, சிங்கவால் குரங்கு உள்ளிட்ட ஏராளமான வன உயிரினங்களின் வாழ்விடச் சூழலுடன் தொடா்புடைய பாதுகாக்கப்பட்ட வனப் பகுதியாக உள்ளது. இந்த நிலையில், அதிக மனித நடமாட்டம் கொண்ட சுற்றுலாத் தலமாக மாற்றக் கோருவது வனப் பாதுகாப்பு நோக்கில் ஆபத்தான அணுகு முறையாகும்.

எனவே, தலையணையை சுற்றுலாத் தலமாக்க வேண்டும் என்ற கோரிக்கையை தமிழக அரசு நிராகரிக்க வேண்டும் என அதில் தெரிவித்துள்ளாா்.