அடிப்படை வசதியின்றி கோவில்பட்டி அரசு ஊழியர் குடியிருப்பு

கோவில்பட்டியில் சேதமடைந்த நிலையில் உள்ள அரசு ஊழியர் குடியிருப்பை புதுப்பித்து, அடிப்படை வசதிகள் செய்துதர வேண்டும் என அரசு ஊழியர்கள் கோரிக்கை விடுத்துள்ளனர்.

தமிழ்நாடு வீட்டு வசதி வாரியம் மூலமாக 1978இல் கோவில்பட்டி - எட்டயபுரம் சாலையில் அரசு ஊழியர் குடியிருப்பு கட்டப்பட்டது. இங்கு 30 வீடுகள் உள்ளன. இதில் 26 வீடுகளில் சுமார் 120  பேர் வசித்து வருகின்றனர். இவ் வளாகத்தில் சீவலப்பேரி குடிநீர் இணைப்புகள் நான்கு உள்ளன. சுமார் 12முதல் 15நாள்களுக்கு ஒருமுறை தரைமட்ட குடிநீர்த் தொட்டியில் சேமிக்கப்பட்டு, பின்னர் குடியிருப்பில் உள்ளோருக்கு விநியோகிக்கப்படுகிறது.

தரைமட்ட நீர்த்தேக்கத் தொட்டி மற்றும் குடிநீர்த் தொட்டிகள் சில ஆண்டுகளாகவே சுத்தம் செய்யப்படாமல் உள்ளதால், இந்த குடிநீரை பயன்படுத்த முடியாத நிலை உள்ளதாக குடியிருப்புவாசிகள் புகார் தெரிவிக்கின்றனர். இதனால் லாரிகள் மூலம் வரும் குடிநீரை விலைக்கு வாங்கி பயன்படுத்த வேண்டிய நிலை உள்ளது. மேலும், குடிநீர் பயன்பாட்டுக்கு என தோண்டப்பட்ட ஆழ்துளைக் கிணறுகளும் பழுதடைந்த நிலையில் உள்ளன.  இக் குடியிருப்பு பகுதியில் தெற்கு, வடக்குப் பகுதிகளில் சுற்றுச்சுவர் இல்லாததால் வாகனங்கள் அடிக்கடி திருடு போகின்றன.

குடியிருப்புக் கட்டடங்கள் பல ஆண்டுகளாக பராமரிப்பின்றி, பெரும்பாலான வீடுகள் மிகவும் பழுதடைந்த நிலையிலே இருந்து வருகிறது. வளாகத்தில் பன்றிகள் உள்ளிட்ட கால்நடைகள் சுற்றித் திரிவதாலும், சாலை வசதி, கழிவுநீர் ஓடை வசதி இல்லாததால் தண்ணீர் தேங்கி கொசு உற்பத்தியாகிவருவதாலும், சுகாதாரக் கேடு ஏற்படும் அபாயம் உள்ளது. வளாகத்தில் 2 மின்கம்பங்கள் மிகவும் ஆபத்தான நிலையில் உள்ளன.

இதுகுறித்து அப்பகுதியில் வசிக்கும் ஜெயமீனா கூறியது: வீட்டு வசதி வாரியம் அனைத்து அடிப்படை வசதிகளையும் செய்துதந்து குடியிருப்புகளை தரமான முறையில் பராமரிக்க நடவடிக்கை எடுக்க வேண்டும். நிறைவேற்றத் தவறினால், இங்கு குடியிருப்போர் குடும்பத்துடன் சாலை மறியலில் ஈடுபடவுள்ளோம் என்றார்.

சுப்புராஜ் கூறியது: எவ்வித பாதுகாப்பும், அடிப்படை வசதியுமின்றி வசித்து வருகிறோம். வளாகம் அருகே கழிவுநீர் ஓடை செல்வதால் துர்நாற்றம் வீசுகிறது. இதனால் சுகாதாரக் கேடு ஏற்படுகிறது. இங்கு போதுமான குடிநீர் வசதி மற்றும் புழக்கத்துக்கு உண்டான நிலத்தடி நீரும் கிடைப்பதற்கு வீட்டு வசதி வாரியம் ஏற்பாடு செய்ய வேண்டும். அனைத்து அடிப்படை வசதிகளும் கிடைக்க மாவட்ட  நிர்வாகம் நடவடிக்கை எடுக்க வேண்டும் என்றார்.