குளத்தூரில் பிளாஸ்டிக் ஒழிப்பு விழிப்புணர்வுப் பேரணி

விளாத்திகுளம் அருகே குளத்தூரில் மகளிர் சுயஉதவிக் குழு சார்பில் பிளாஸ்டிக் ஒழிப்பு குறித்த விழிப்புணர்வுப் பேரணி சனிக்கிழமை நடைபெற்றது.

இந்த பேரணிக்கு குளத்தூர் ஊராட்சி மன்றத் தலைவர் ராஜபாண்டியன் தலைமை வகித்தார். வேப்பலோடை அன்னை தெரசா பொதுநலச் சங்கத் தலைவர் முனியசாமி, ஒன்றியக் குழு உறுப்பினர் தர்மராஜ் ஆகியோர் முன்னிலை வகித்தனர்.

இப்பேரணியில் விழிப்புணர்வு வாசகங்கள் அடங்கிய பதாகைகளுடன் 400-க்கும் மேற்பட்ட பெண்கள் கலந்துகொண்டனர். குளத்தூர் கிழக்கு கடற்கரைச் சாலை சந்திப்பில் தொடங்கிய பேரணி ராமசந்திராபுரம், குளத்தூர் காலனி, தெற்கு கல்மேடு, பனையூர், கலைஞானபுரம், கல்லூரணி வழியாகச் சென்று குளத்தூர் இந்து நாடார் நடுநிலைப் பள்ளியில் நிறைவடைந்தது.

பின்னர் பள்ளியில் நடைபெற்ற மகளிர் சுயஉதவிக் குழுக் கூட்டத்தில் பிளாஸ்டிக் உபயோகிப்பதால் ஏற்படும் தீமைகள் குறித்து ஆசிரியர் மரியஅனிதா, சுயஉதவிக் குழு வட்டார ஒருங்கிணைப்பாளர் இளங்குமரன் ஆகியோர் பேசினர்.

குளத்தூர் காவல் உதவி ஆய்வாளர்கள் பாபநாசம், ஆதிலிங்கம், குளத்தூர் கிராம வளர்ச்சிக் குழு நிர்வாகிகள் பிரேமா சின்னச்சாமி, ஜேம்ஸ் அமிர்தராஜ், மேட்டுபனையூர் ஊராட்சித் தலைவர் முனியசாமி உள்ளிட்ட பலர் கலந்துகொண்டனர்.