பராமரிப்புப் பணிகள் ஒத்திவைப்பு தூத்துக்குடி அனல்மின் நிலையத்தில் 5 ஆவது அலகில் மீண்டும் மின் உற்பத்தி

மின்பற்றாக்குறை காரணமாக தூத்துக்குடி அனல் மின் நிலையத்தில் 5 ஆவது அலகில் நடைபெற்று வந்த பராமரிப்புப் பணிகள் ஒத்திவைக்கப்பட்டு, வெள்ளிக்கிழமை மீண்டும் மின் உற்பத்தி தொடங்கப்பட்டது.

எனினும், 2 ஆவது, 3 ஆவது அலகுகளில் பராமரிப்பு பணிகள் தொடருவதால் 420 மெகாவாட் மின்உற்பத்தி பாதிக்கப்பட்டுள்ளது.

இந்த அனல்மின் நிலையத்தில் தலா 210 மெகாவாட் மின் உற்பத்தி திறன் கொண்ட 5 அலகுகள் மூலம் தினமும் ஏறத்தாழ 1050 மெகாவாட் வரை மின் உற்பத்தி செய்யப்பட்டு வருகிறது. இந்நிலையில், பராமரிப்புப் பணிக்காக  2 ஆவது அலகில் வியாழக்கிழமை இரவு மின் உற்பத்தி நிறுத்தப்பட்டது.

இந்த அலகில் 7 நாள்களுக்கு பராமரிப்புப் பணிகள் நடைபெறும் என அறிவிக்கப்பட்டது. ஏற்கெனவே, 5 ஆவது அலகில் ஆகஸ்ட் 16 ஆம் தேதியிலிருந்தும், 3 ஆவது அலகில் கடந்த 8 ஆம் தேதியிலிருந்தும் பராமரிப்புப் பணிகள் நடைபெற்று வந்தன.

மூன்று அலகுகளிலும் ஒரே நேரத்தில் பராமரிப்புப் பணிகள் நடைபெறுவதால் 630 மெகாவாட் மின் உற்பத்தி பாதிக்கப்பட்டது.

 இதையடுத்து, மின் வெட்டு ஏற்படும் சூழல் உருவானதால் 2 ஆவது அலகில் 4 நாள்கள் மட்டும் பராமரிப்புப் பணிகளை மேற்கொள்ள முடிவு செய்த அதிகாரிகள் உடனடியாக 5 ஆவது அலகில் மின் உற்பத்தியை தொடங்க உத்தரவிட்டனர். பராமரிப்புப் பணிகள் பாதியில் நிறுத்தப்பட்டு 5 ஆவது அலகில் வெள்ளிக்கிழமை முதல் மீண்டும் மின் உற்பத்தி தொடங்கப்பட்டது.

 இரண்டாவது, 3 ஆவது அலகுகளில் தொடர்ந்து பராமரிப்புப் பணிகள் நடைபெற்று வருவதால் அனல்மின் நிலையத்தில் வெள்ளிக்கிழமை இரவு நிலவரப்படி 420 மெகாவாட் மின் உற்பத்தி பாதிக்கப்பட்டது.