சாத்தான்குளம் அருகே இரு இடங்களில் பெண்களிடம் 15 பவுன் நகை பறிப்பு

சாத்தான்குளம் அருகே வெவ்வேறு இடங்களில்   2 பெண்களிடம் 15 பவுன் தங்க நகைகளை பறித்துச் சென்ற அடையாளம் தெரியாத நபர்களை போலீஸார் தேடி வருகின்றனர்.
சாத்தான்குளம் அருகே உள்ள சுப்பராயபுரம் விலக்கு பகுதியைச் சேர்ந்தவர் சிவனேசன் மனைவி சித்திரைபூபதி  (45). இவரது கணவர் சென்னையில் காய்கனி கடை நடத்தி வருகிறார். இவர்  இங்கு இரு குழந்தைகளுடன் வசித்து வருகிறார்.  சனிக்கிழமை மாலை அங்குள்ள விநாயகர் கோயில் அருகே சென்றபோது பைக்கில் வந்த  அடையாளம் தெரியாத இருவர், முகவரி கேட்பது போல அருகில் வந்து, அவர் கழுத்தில் கிடந்த 8 பவுன் தங்கச் சங்கிலியைப் பறித்து கொண்டு தலைமறைவாகினர். 
இதுகுறித்து சித்திரைபூபதி சாத்தான்குளம் காவல் நிலையத்தில் அளித்த புகாரின்பேரில் காவல் ஆய்வாளர் ராஜாசுந்தர் வழக்குப் பதிந்து மர்ம நபர்களை தேடி வருகிறார்.
சாத்தான்குளம் அருகே உள்ள படுக்கப்பத்து அழகப்பபுரத்தைச் சேர்ந்தவர் குமாரசாமி மனைவி தங்கலதா (45). இவர், அவரது வீட்டருகே பெட்டி கடை நடத்தி வருகிறார். ஞாயிற்றுக்கிழமை காலையில் தங்கலதா கடையில் இருந்தபோது பைக்கில் வந்த அடையாளம் தெரியாத இருவர், பொருள்கள் வாங்குவது போல அருகே வந்து அவர்  கழுத்தில் கிடந்த 7 பவுன் தங்க நகையைப்  பறித்துக் கொண்டு தலைமறைவாகினர். இதுகுறித்து அவர் அளித்த புகாரின்பேரில் தட்டார்மடம் காவல் ஆய்வாளர் கஜேந்திரன் வழக்குபதிந்து மர்ம நபர்களைத் தேடி வருகிறார்.