காவல் உதவி ஆய்வாளருக்கு மிரட்டல் விடுத்தவா் கைது

தூத்துக்குடியில் ரோந்துப் பணியில் ஈடுபட்டிருந்த காவல் உதவி ஆய்வாளரை பணி செய்யவிடாமல் தடுத்து, அரிவாளைக் காட்டி கொலை மிரட்டல் விடுத்த ரௌடியை போலீஸாா் கைது செய்தனா்.

முத்தையாபுரம் சிறப்பு உதவி ஆய்வாளா் பாண்டியன் தலைமையிலான போலீஸாா், கக்கன்ஜி நகரில் ரோந்துப் பணியில் ஈடுபட்டிருந்தனா்.

அப்போது, பொதுமக்களை அச்சுறுத்தும் வகையில் அரிவாளுடன் சுற்றித்திரிந்த இளைஞரைப் பிடிக்க முயன்றனா். அவா் போலீஸாரை பணி செய்யவிடாமல் தடுத்து, அரிவாளைக் காட்டி கொலை மிரட்டல் விடுத்தாராம்.

இதையடுத்து, அவரைப் பிடித்து விசாரித்ததில், முத்தையாபுரம் நேரு நகரைச் சோ்ந்த சந்துரு (20) என்பது தெரியவந்தது. இதுகுறித்து முத்தையாபுரம் போலீஸாா் வழக்குப் பதிவு செய்து அவரைக் கைது செய்தனா். அவா் மீது ஏற்கெனவே 8 வழக்குகள் நிலுவையில் உள்ளதாகவும், ரௌடிகள் பட்டியலில் அவரது பெயா் இடம் பெற்றிருப்பதாகவும் போலீஸாா் தெரிவித்தனா்.