கழுகுமலை அருகே காணாமல் போன தொழிலாளி சடலமாக மீட்பு

கழுகுமலை அருகே காணாமல் போன தொழிலாளியை சடலமாக சனிக்கிழமை மீட்டனா்.

கோவில்பட்டி வட்டம் முடுக்கலாங்குளம் கிழக்குத் தெருவை சோ்ந்த மாரியப்பன் மகன் முத்துப்பாண்டியன் (35). டைல்ஸ் ஒட்டும் தொழிலாளியான இவருக்கு, திருமணம் ஆகவில்லை.

இம்மாதம் 21ஆம் தேதி வழக்கம் போல வேலைக்கு செல்வதாக கூறிச் சென்ற இவா், பின்னா் வீடு திரும்பவில்லையாம். இந்நிலையில், கழுகுமலை குமரேசன் நகா் குளத்துக் கரையில் முத்துப்பாண்டியன் இறந்து கிடந்ததாகவும், அவரது சடலத்தை கோவில்பட்டி அரசு மருத்துவமனைக்கு அனுப்பி வைத்திருப்பதாகவும் மாரியப்பனுக்கு சனிக்கிழமை தகவல் கிடைத்தது.

அதன் பேரில் மாரியப்பன், உறவினா்கள் கோவில்பட்டி அரசு மருத்துவமனைக்கு சென்று பாா்வையிட்டனா். பின்னா் கழுகுமலை காவல் நிலையத்தில் மாரியப்பன் புகாா் அளித்தாா். போலீசாா் வழக்குப் பதிந்து முத்துப்பாண்டியன் இறப்பிற்கான காரணம் குறித்து விசாரித்து வருகின்றனா்.