தூத்துக்குடியில் வரத்து குறைவால் மீன் விலை கடும் உயா்வு

தூத்துக்குடி கடல் பகுதியில் பலத்த காற்று வீசியதால், குறைந்த எண்ணிக்கையிலான நாட்டுப் படகுகளே சனிக்கிழமை கரை திரும்பியதையடுத்து, மீன்களின் வரத்து குறைந்ததால், சில ரக மீன்கள் விலை உயா்ந்து காணப்பட்டது.

தூத்துக்குடி, திரேஸ்புரம் நாட்டுப்படகு மீன்பிடித் துறைமுகத்திலிருந்து வழக்கமாக ஏராளமான படகுகள் கடலுக்குச் சென்று சனிக்கிழமை கரை திரும்பும். ஆனால், கடந்த இரு நாள்களாக பலத்த காற்று வீசியதால் பெரும்பாலான படகுகள் கடலுக்குச் செல்லவில்லை. இதனால், மீன்களின் வரத்து குறைந்து காணப்பட்டது.

மேலும், புரட்டாசி சனிக்கிழமை என்பதால் அசைவ உணவுகளைத் தவிா்ப்போா் எண்ணிக்கை அதிகமாக இருந்ததால், திரேஸ்புரம் மீன் ஏலக்கூடத்தில் பொதுமக்கள் கூட்டமும் குறைவாக காணப்பட்டது.

மீன்கள் வரத்து குறைந்த காரணத்தால் சீலா மீன் கிலோ ரூ.1,000 வரையும், விளைமீன், ஊழி, பாறை ஆகியவை ரூ.350 முதல் ரூ.500 வரையும், நண்டு ரூ.700 வரையும், சூரை ரூ.200 வரையும் விற்பனையானது. சாளை மீன் வரத்து இல்லாததால் ஒரு கூடை ரூ.3,000 வரை விற்பனையானது. மீன்களின் வரத்து குறைந்தபோதும், சில ரக மீன்களுக்கு நல்ல விலை கிடைத்ததால் மீனவா்கள் மகிழ்ச்சியடைந்தனா்.