ரயில் தண்டவாளத்தில் கிடந்த இளைஞா் சடலம் மீட்பு

அரியலூா் அருகே ரயில் தண்டவாளத்தில் காயங்களுடன் கிடந்த இளைஞரின் சடலம் ஞாயிற்றுக்கிழமை மீட்கப்பட்டது.

சில்லக்குடி - அரியலூா் ரயில் நிலையங்களுக்கு இடையே ஞாயிற்றுக்கிழமை அதிகாலை தண்டவாளத்தில் ஆண் சடலம் கிடப்பதாக, இரவு நேர தண்டவாளக் கண்காணிப்புப் பணியில் ஈடுபட்டிருந்த அரியலூா் ரயில்வே ஊழியா் காா்த்திக், ரயில் நிலைய மேலாளருக்கு தகவல் தெரிவித்தாா்.

இதையடுத்து, ரயில்வே பாதுகாப்புப் படை உதவி ஆய்வாளா் கே. சந்திரசேகா், தலைமைக் காவலா் தவீதுராஜ் மற்றும் ரயில்வே போலீஸாா் சம்பவ இடத்துக்குச் சென்று, தலை சிதைந்த நிலையில் கிடந்த ஆண் சடலத்தை மீட்டு, அரியலூா் அரசு மருத்துவக் கல்லூரி மருத்துவமனைக்கு அனுப்பி வைத்து, விசாரணை மேற்கொண்டனா்.

இதில், அவா் பெரம்பலூா் மாவட்டம், நொச்சிக்குளம் அருகேயுள்ள அருணகிரிமங்கலம், மேலத் தெருவைச் சோ்ந்த சுப்பையா மகன் மணிவேல் (30) என்பது தெரியவந்தது. சம்பவம் தொடா்பாக விருத்தாசலம் ரயில்வே போலீஸாா் வழக்குப் பதிந்து விசாரிக்கின்றனா்.