பெரம்பலூர் ஆயுதப்படை வளாகத்தில் காவலர்களுக்கான பல்பொருள் அங்காடி

பெரம்பலூரில் காவல் துறையினருக்கு மலிவு விலையில் பொருள்களை விற்பனை செய்யும் வகையில், புதியதாக பல்பொருள் அங்காடி தொடக்க விழா திங்கள்கிழமை நடைபெற்றது.

ஆயுதப்படை மைதானத்தில் அமைக்கப்பட்டுள்ள அங்காடியை தொடங்கி வைத்து மாவட்ட காவல் கண்காணிப்பாளர் சோனல் சந்த்ரா பேசியது: காவலர்களின் நலன் கருதி, தமிழக அரசு மலிவு விலையில் பொருள்கள் விற்பனை செய்யும் அங்காடியை தொடங்க உத்தரவிட்டது. இதில், காவலர்கள் மட்டுமின்றி ஓய்வு பெற்ற போலீஸார், சிறைத் துறை, தீயணைப்புத் துறை, வனத் துறையினரும் தங்களது குடும்பத்துக்கு தேவையானப் பொருள்களை வாங்கிப் பயன்பெறலாம். இங்கு, திங்கள்கிழமையை தவிர அனைத்து நாள்களிலும் விற்பனை நடைபெறும். காவலர்கள் அல்லது அவர்களது குடும்பத்தைச் சேர்ந்தவர்கள் அடையாள அட்டையுடன் நேரில் வந்து பொருள்களை வாங்கிப் பயன்பெறலாம்.

இந்த அங்காடியில் காவலர்கள் ரூ. 3 ஆயிரம், துணைக் கண்காணிப்பாளர்கள் முதல் உதவி ஆய்வாளர்கள் வரை ரூ. 5 ஆயிரம், காவல் கண்காணிப்பாளர் மற்றும் அதற்கு மேல் உள்ள அதிகாரிகள் ரூ. 7 ஆயிரம் வரை மாதந்தோறும் பொருள்களை வாங்கலாம். இங்கு விற்கப்படும் பொருள்களுக்கு எந்தவித வரியும் கிடையாது. இதனால், பொருள்களின் விலை வெளிச் சந்தையைவிட குறைவாக இருக்கும். இதை காவலர்கள் முறையாக பயன்படுத்திக் கொள்ள வேண்டும் என்றார் அவர்.