"மருத்துவம், வேளாண், பொறியியல் கல்லூரிகள்  வேண்டும்'

பெரம்பலூர் மாவட்டத்தில் மருத்துவம், வேளாண்மை, பொறியியல் கல்லூரிகள் தொடங்க தமிழக அரசு நடவடிக்கை எடுக்க வேண்டும் என  இந்திய மாணவர் சங்க மாவட்ட மாநாட்டில் வலியுறுத்தப்பட்டது.
பெரம்பலூரில் இந்திய மாணவர் சங்க பெரம்பலூர் மாவட்ட மாநாடு ஞாயிற்றுக்கிழமை நடைபெற்றது.)  சங்கத்தின் மாவட்ட செயலர் ஸ்டாலின் தலைமை வகித்தார். சங்க நிர்வாகிகள் நிவாஸ், மதுபாலா, ரேகா, முகிலம், விஷ்ணு பிரீத்தா, நர்மதா, குணமதி ஆகியோர் முன்னிலை வகித்தனர். 
தமிழ்நாடு முற்போக்கு எழுத்தாளர்கள், கலைஞர்கள் சங்க மாவட்ட செயலர் ப. செல்வக்குமார் தொடக்கவுரையாற்றினார். 
மாநில துணைத் தலைவர் நிரூபன், மாநில செயற்குழு உறுப்பினர்கள் ஆறு. பிரகாஷ், து. அருணன் ஆகியோர் சிறப்புரையாற்றினர். 
 இந்த மாநாட்டில், நீட் தேர்வை ரத்து செய்ய வேண்டும். நீட் தேர்வுக்கு எதிராகப் போராடிய மாணவர்கள் மீது போடப்பட்ட வழக்குகளை தமிழக அரசு திரும்பப் பெற வேண்டும். அரசுப் பள்ளிகளில் மாணவர்களின் எண்ணிக்கையைக் குறைத்து பள்ளிகளை இழுத்து மூடும் நடவடிக்கையை தமிழக அரசு கைவிட வேண்டும். விடுதி மாணவர்களுக்கான உணவுத் தொகையை உயர்த்தி, தரமான உணவு வழங்க வேண்டும். 
பெரம்பலூர் மாவட்டத்தில் அரசு மருத்துவக் கல்லூரி, வேளாண்மைக் கல்லூரி, பொறியியல் கல்லூரி தொடங்க தமிழக அரசு நடவடிக்கை எடுக்க வேண்டும். தனியார் பள்ளி, கல்லூரிகளில் கட்டணக் கொள்ளையை தமிழக அரசு தடுத்து நிறுத்த வேண்டும். 
ஆசிரியர் காலியிடங்களை நிரப்ப வேண்டும். அரசுப் பள்ளி, கல்லூரிகளின் உள்கட்டமைப்பு வசதிகளை மேம்படுத்த வேண்டும் என்பன உள்ளிட்ட கோரிக்கைகளை வலியுறுத்தியும், பல்கலைக் கழக மானியக் குழுவை கலைத்துவிட்டு அரசு கல்லூரிகளை தனியாருக்கு தாரை வார்க்க முயற்சிக்கும் மத்திய அரசைக் கண்டித்தும் தீர்மானங்கள் நிறைவேற்றப்பட்டன.
இதில், மக்கள் நல்வாழ்வுக்கான மருத்துவர் அரங்க மாநிலச் செயலர் சி. கருணாகரன், முன்னாள் மாவட்டச் செயலர் செல்வக்குமார், பி. ரமேஷ், கவிஞர்கள் ராமர், அகவி உள்ளிட்ட பலர் பங்கேற்றனர்.