84 திருட்டு டிவிடிகள் பறிமுதல்: 3 பேர் கைது

தஞ்சாவூரில் திருட்டு டி.வி.டி.கள் வைத்திருந்ததாக 3 பேரை போலீஸார் வெள்ளிக்கிழமை கைது செய்தனர்.

தஞ்சாவூர் தெற்கு அலங்கம் பகுதியில் மேற்கு போலீஸார் வெள்ளிக்கிழமை சோதனை மேற்கொண்டனர். அப்போது அப்பகுதியில் உள்ள இரு கடைகளில் பாயும் புலி, ஸ்ட்ராபெரி, மாயா, 49 ஓ, யட்சன், ஜிகினா உள்ளிட்ட புதுப் படங்களின் டி.வி.டி.கள் இருந்தது தெரிய வந்தது.

இதுதொடர்பாக கடையில் இருந்த வெங்கடேசன் (21), வினோத் (29) ஆகியோரை போலீஸார் கைது செய்தனர். இவர்களிடமிருந்து 34 திருட்டு டி.வி.டி.கள் பறிமுதல் செய்யப்பட்டன.

இதேபோல், கும்பகோணம் பகுதியில் 50 திருட்டு டி.வி.டி.கள் வைத்திருந்ததாக கக்கன் காலனி செல்வத்தை (28) மேற்கு போலீஸார் கைது செய்தனர்.