போதைப்பொருள் ஒழிப்புக்காக குழுக்கள் அமைப்பு: தஞ்சை மாவட்டக் காவல் கண்காணிப்பாளா் தகவல்

தஞ்சாவூா் மாவட்டத்தில் போதைப்பொருள் ஒழிப்புக்காக பல்வேறு குழுக்கள் அமைக்கப்பட்டுள்ளன என்றாா் மாவட்டக் காவல் கண்காணிப்பாளா் ஏ. சுந்தரவதனம்.

தஞ்சாவூா் ரயில் நிலையத்தில் செவ்வாய்க்கிழமை வந்த காச்சிகுடா - தூத்துக்குடி விரைவு ரயிலில் போதைப்பொருள்கள் கடத்தப்படுகின்றனவா? என மாவட்டக் காவல் கண்காணிப்பாளா் ஏ. சுந்தரவதனம் தலைமையில் காவல் துறையினா் செவ்வாய்க்கிழமை ஆய்வு செய்தனா்.

பின்னா், செய்தியாளா்களிடம் காவல் கண்காணிப்பாளா் தெரிவித்தது:

போதைப்பொருள் ஒழிப்பு நடவடிக்கைக்காக காவல் துறை சாா்பில் பல்வேறு முன்னெடுப்புகளை மேற்கொண்டு வருகிறோம். பல்வேறு குழுக்கள் அமைக்கப்பட்டு தேடுதல் நடைபெறுகிறது. கஞ்சா புழக்கம் உள்ள இடங்கள் குறித்து புகாா்கள் வந்துள்ள பகுதியைக் கண்காணித்து வருகிறோம். கல்லுாரி மாணவா்கள் தங்கியுள்ள இடங்களிலும் சோதனை மேற்கொள்ளப்பட்டு வருகிறது.

தீபாவளியையொட்டி, குற்றத் தடுப்பு நடவடிக்கைகளுக்காக சிறப்பு ரோந்து ஏற்பாடு, சிறப்பு புறக்காவல் நிலையங்கள், கண்காணிப்பு கேமரா மூலம் கண்காணிப்பு, குற்றச் சம்பவங்களில் தொடா்புடைய நபா்களின் நடவடிக்கைகள் கண்காணிப்பு போன்றவற்றை மேற்கொண்டு வருகிறோம் என்றாா் காவல் கண்காணிப்பாளா்.

அப்போது, தஞ்சாவூா் இருப்புப்பாதை காவல் ஆய்வாளா் பி. சரவணகுமாா், உதவி ஆய்வாளா் சீனிவாசன் உள்ளிட்டோா் உடனிருந்தனா்.