மழையில் நனைந்த நெல் மூட்டைகள் அலுவலா்கள் மீது நடவடிக்கை! அமைச்சா் வினோத்

கும்பகோணம் அருகே பட்டீசுவரத்தில் திறந்தவெளி சேமிப்பு கிடங்கில் மழையில் நெல் மூட்டைகள் நனைந்து சேதமடைந்தது தொடா்பாக அலுவலா்கள் மீது உரிய நடவடிக்கை எடுக்கப்படும் என்றாா் வேளாண் துறை அமைச்சா் ர. வினோத்.

தஞ்சாவூா் மாவட்டம், கும்பகோணம் வட்டாரத்தில் ஞாயிற்றுக்கிழமை இரவு முழுவதும் பெய்த கன மழையால் ஏற்பட்ட சேதங்களை அமைச்சா் ர. வினோத் திங்கள்கிழமை பாா்வையிட்டாா்.

பட்டீசுவரத்தில் உள்ள தமிழ்நாடு நுகா்பொருள் வாணிபக் கழகத்துக்கு சொந்தமான திறந்தவெளி நெல் சேமிப்பு கிடங்கை அமைச்சா் பாா்வையிட்டு ஆய்வு செய்தாா்.

அப்போது, அந்தக் கிடங்கில் அடுக்கி வைக்கப்பட்டிருந்த நெல் மூட்டைகள் மீது போா்த்தப்பட்டிருந்த தாா்பாய்கள் கிழிந்திருந்ததால், நெல் மூட்டைகள் மழையில் நனைந்து சேதமடைந்திருந்தன. இதை பாா்த்த அமைச்சா், சேமிப்பு கிடங்கு அலுவலா்களை கண்டித்ததுடன், கிழிந்த தாா்பாய்களை அகற்றிவிட்டு, சேதமடைந்த நெல் மூட்டைகளை உரிய முறையில் பாதுகாக்குமாறு உத்தரவிட்டாா்.

பின்னா் செய்தியாளா்களிடம் அமைச்சா் கூறியதாவது: பருவமழையால் விவசாயிகள் பாதிக்கப்படாமல் இருக்க தேவையான நடவடிக்கைகளை எடுக்குமாறு அமைச்சா்களுக்கு முதல்வா் அறிவுறுத்தியுள்ளாா்.

பட்டீசுவரத்தில் உள்ள திறந்தவெளி நெல் சேமிப்பு கிடங்கில் மழையிலிருந்து நெல் மூட்டைகளை பாதுகாக்க தவறிய அலுவலா்கள் மீது நடவடிக்கை எடுக்கப்படும். கிடங்குகளில் உள்ள நெல்மூட்டைகள் விரைவில் அரைவைக்கு அனுப்பப்படும் என்றாா் அமைச்சா்.