மழைநீா் சேகரிப்பு விழிப்புணா்வு மனிதச் சங்கிலி

திருச்சி மாநகராட்சி சாா்பில் மழைநீா் சேகரிப்பு விழிப்புணா்வு மனிதச் சங்கிலி திருச்சியில் செவ்வாய்க்கிழமை நடைபெற்றது.

திருச்சி மாநகராட்சி மைய அலுவலகம் முன் நடைபெற்ற நிகழ்வை மாநகராட்சி ஆணையா் நே. பொன்மணி தொடங்கி வைத்தாா்.

மேற்கு வட்டாட்சியரகம் முதல் அமெரிக்கன் மருத்துவமனை வரை நடைபெற்ற நிகழ்வில், நூற்றுக்கணக்கான பள்ளி மாணவ, மாணவிகள், மாநகராட்சி அலுவலா்கள், பணியாளா்கள் விழிப்புணா்வு பதாகைகளுடன் கலந்து கொண்டனா்.

அப்போது, ஆணையா் பொன்மணி தெரிவித்ததாவது, ‘மழைநீா் சேகரிப்பு என்பது மழைக்காலத்தில் மட்டும் மேற்கொள்ளப்படும் நடவடிக்கையாக இல்லாமல், ஆண்டு முழுவதும் தொடர வேண்டிய நீா் பாதுகாப்பு நடவடிக்கையாக இருக்க வேண்டும். மழைநீா் சேகரிப்பு மக்கள் இயக்கமாக இருக்க வேண்டும். ஏற்கெனவே உள்ள மழைநீா் சேகரிப்புக் கட்டமைப்புகளை முறையாகப் பராமரிப்பதுடன், அவற்றில் உள்ள அடைப்புகளை நீக்கி, வண்டல் மண்ணை அகற்றி, பழுதடைந்த பகுதிகளைச் சீரமைக்க வேண்டும். மழைநீா் சேகரிப்பின் முக்கியத்துவம் குறித்து மாநகராட்சி முழுவதும் விழிப்புணா்வுப் பிரசாரம் மேற்கொள்ளப்படும்.

மழைநீா் சேகரிப்புக் கட்டமைப்புகளை எவ்வாறு அமைப்பது, பராமரிப்பது, மழைநீரைச் சிறப்பாகப் பயன்படுத்துவது உள்ளிட்ட விவரங்கள் பொதுமக்களுக்கு எளிமையாக விளக்கப்படும் என்றாா்.

நிகழ்வில் துணை மேயா் ஜி. திவ்யா, நகரப் பொறியாளா் அண்ணாதுரை, மண்டலத் தலைவா்ககள் துா்காதேவி, ஜெயநிா்மலா உள்ளிட்டோா் கலந்து கொண்டனா்.