ஸ்ரீரங்கம் கோயிலில் ஊஞ்சல் உற்ஸவ விழா தீா்த்தவாரி கண்டருளினாா் நம்பெருமாள்

ஸ்ரீரங்கம் அரங்கநாத சுவாமி கோயிலில் நடைபெற்று வந்த ஊஞ்சல் உற்ஸவ விழாவின் நிறைவு நாளான வியாழக்கிழமை காலை நம்பெருமாள் சந்திரபுஷ்கரணி குளத்தில் தீா்த்தவாரி கண்டருளினாா். இதில் ஏராளமான பக்தா்கள் கலந்து கொண்டு தரிசனம் செய்தனா்.

ஸ்ரீரங்கம் கோயிலில் ஊஞ்சல் உற்ஸவ விழா அக்டோபா் 28-ஆம் தேதி தொடங்கியது. 9 நாள்கள் நடைபெற்று வந்த இந்த விழா வியாழக்கிழமையுடன் நிறைவடைந்தது.

முன்னதாக, விழாவின் ஓவ்வொரு நாளும் நம்பெருமாள் சிறப்பு அலங்காரத்தில் ஊஞ்சல் மண்டபத்தில் எழுந்தருளி பக்தா்களுக்கு சேவை சாதித்தாா்.

விழாவின் முக்கிய நிகழ்வாக கடந்த 3-ஆம் தேதி நெல்லளவு கண்டருளுதல் நிகழ்ச்சி நடைபெற்றது. விழாவின் நிறைவு நாளான வியாழக்கிழமை காலை 9.15 மணிக்கு நம்பெருமாள் மூலஸ்தானத்திலிருந்து தீா்த்தபேரா் பெருமாளுடன் புறப்பட்டு, சந்திரபுஷ்கரணி குளத்துக்கு 9.45 மணிக்கு வந்து சோ்ந்தாா்.

அங்கு குளத்தின் கரையில் நம்பெருமாள் சிறப்பு அலங்காரத்தில் எழுந்தருளியிருந்தாா். நம்பெருமாளுக்கு பதிலாக தீா்த்தபேரா் பெருமாள் சந்திரபுஷ்கரணி குளத்தில் தீா்த்தவாரி கண்டருளினாா். இதை ஏராளமான பக்தா்கள் தரிசனம் செய்தனா். பின்னா் அங்கிருந்து புறப்பட்டு 10.15 மணிக்கு ஊஞ்சல் மண்டபத்துக்கு நம்பெருமாள் வந்து சோ்ந்தாா். 11.30 மணி முதல் பிற்பகல் 1.30 மணி வரை நம்பெருமாளுக்கு திருமஞ்சனம் நடைபெற்றது.

தொடா்ந்து அலங்காரம் அழுது செய்யப்பட்டது. பின்னா், மாலை 6 மணிக்கு ஊஞ்சல் மண்டபத்தில் நம்பெருமாள் ஊஞ்சல் விழா தொடங்கி இரவு 8 மணி வரை நடைபெற்றது. பின்னா் 9.15 மணிக்கு மேற்படி மண்டபத்திலிருந்து புறப்பட்டு படிப்பு கண்டருளி 9.45 மணிக்கு மூலஸ்தானம் சென்று சோ்ந்தாா். இத்துடன் விழா நிறைவடைந்தது. விழா ஏற்பாடுகளை கோயில் நிா்வாகத்தினா் செய்திருந்தனா்.