திருச்சி விமான நிலையத்தில் 74 பவுன் கடத்தல் தங்கம் பறிமுதல்: 2 போ் கைது

சிங்கப்பூரிலிருந்து 74 பவுன் தங்கத்தை கடத்தி வந்த 2 பயணிகளை திருச்சி விமான நிலையத்தில் சுங்கத் துறையினா் வியாழக்கிழமை கைது செய்தனா்.

திருச்சி பன்னாட்டு விமான நிலையத்துக்கு சிங்கப்பூரில் இருந்து ஸ்கூட் விமானம் வியாழக்கிழமை அதிகாலை வந்தது. அந்த விமானத்தில் தங்கம் கடத்தி வருவதாக சுங்கத் துறையினருக்கு தகவல் கிடைத்தது. இதையடுத்து, அந்த விமானத்தில் வந்த பயணிகள் மற்றும் அவா்களின் உடைமைகளை சுங்கத் துறையின் வான் நுண்ணறிவுப் பிரிவினா் சோதனை செய்தனா்.

இதில், இரண்டு ஆண் பயணிகள் தங்களின் உள்ளாடையில் மறைத்து தங்கத்தை கடத்தி வந்தது தெரியவந்தது. இதையடுத்து, அவா்கள் இருவரையும் கைது செய்த சுங்கத் துறை அதிகாரிகள், அவா்களிடமிருந்து ரூ.90.33 லட்சம் மதிப்புள்ள 74 பவுன் தங்கத்தை (பசை வடிவில்) பறிமுதல் செய்தனா்.

மற்றொரு சம்பவம்: இதேபோல, கடந்த செவ்வாய்க்கிழமை நள்ளிரவு துபையில் இருந்து திருச்சிக்கு ஏா் இந்தியா எக்ஸ்பிரஸ் விமானத்தில் வந்த பயணிகளிடம் சுங்கத் துறை அதிகாரிகள் சோதனை மேற்கொண்டனா்.

அப்போது, பெண் பயணி தனது கைப்பையில் பட்டனில் மறைத்து வைத்து, 41.5 பவுன் தங்கத்தை கடத்தி வந்தது தெரியவந்தது. இதையடுத்து, அவற்றைப் பறிமுதல் செய்த சுங்கத் துறை அதிகாரிகள், தங்கம் கடத்தி வந்த பெண் பயணியையும் கைது செய்தனா்.