கேரளத்துக்கு ரூ. 5.40 கோடி நிதியுதவி: என்எல்சி இந்தியா நிறுவனம் வழங்கியது

கேரளத்தில் வெள்ள நிவாரணப் பணிகளை மேற்கொள்ள என்எல்சி இந்தியா நிறுவனத்தின் சார்பில், ரூ. 5.40 கோடிக்கான காசோலையை அதன் இயக்குநர் ஆர்.விக்ரமன் கேரள மாநில முதல்வர் பினராயி விஜயனிடம் புதன்கிழமை வழங்கினார்.
 சமீபத்தில் பெய்த பெருமழையால் கேரள மாநிலம் மிகப் பெரிய பேரழிவைச் சந்தித்தது. அங்கு, நிவாரணப் பணிகளை மேற்கொள்ள முதல்வர் பேரிடர் நிவாரண நிதிக்கு நன்கொடை அளித்து உதவுமாறு அந்த மாநில அரசு கேட்டுக் கொண்டது. இதையடுத்து, பல்வேறு மாநில அரசுகள், அமைப்புகள், பொதுமக்கள் என அனைத்துத் தரப்பினரும் ஆர்வமுடன் உதவி வருகின்றனர்.
 இந்த நிலையில், என்எல்சி இந்தியா நிறுவன ஊழியர்கள் தங்களது ஒரு நாள் ஊதியத்தை வழங்க முன்வந்தனர். அவ்வாறு திரட்டப்பபட்ட நிதி ரூ. 3 கோடியே 39 லட்சத்து 70 ஆயிரத்துடன், என்எல்சி இந்தியா நிறுவனம் தனது பங்களிப்பாக ரூ. 2 கோடியைச் சேர்த்து மொத்தம் ரூ. 5 கோடியே 39 லட்சத்து 70 ஆயிரத்தை கேரளத்துக்கு வழங்கியது.
 இதற்கான காசோலையை கேரள முதல்வர் பினராயி விஜயனிடம் திருவனந்தபுரத்தில் புதன்கிழமை என்எல்சி இந்தியா நிறுவனத்தின் மனித வளத் துறை இயக்குநர் ஆர்.விக்ரமன் வழங்கினார்.
 அப்போது, தூத்துக்குடி என்டிபிஎல் நிறுவனத்தின் தலைமைச் செயல் அதிகாரி ஷாஜி ஜான், என்எல்சி இந்தியா நிறுவனத்தின் மனித வளத் துறை தலைமைப் பொது மேலாளர் என்.சதீஷ்பாபு, நிதித் துறைத் தலைமைப் பொது மேலாளர் வி.என்.பாபு உள்ளிட்ட உயரதிகாரிகள் உடனிருந்தனர்.