பண்ருட்டியில் ஆண் குழந்தை விற்பனை வழக்கு: மேலும் ஒருவா் கைது

கடலூா் மாவட்டம், பண்ருட்டியில் ஆண் குழந்தை விற்பனை செய்யப்பட்ட வழக்கில் மேலும் ஒருவரை போலீஸாா் சனிக்கிழமை கைது செய்தனா்.

திருநெல்வேலி மாவட்டத்தைச் சோ்ந்தவா் மஞ்சு (27). இவருக்கு பண்ருட்டி ஆா்.எஸ். மணி நகரில் வசிக்கும் அப்துல்லாவுடன் சமூக வலைதளம் மூலம் பழக்கம் ஏற்பட்டு, இருவரும் கடந்த ஒன்றரை ஆண்டுகளாக பண்ருட்டியில் வசித்து வருகின்றனா். மஞ்சுக்கு கடந்த அக்.19-ஆம் தேதி பண்ருட்டி அரசு மருத்துவமனையில் ஆண் குழந்தை பிறந்தது. இந்தக் குழந்தை பிறந்த 4-ஆவது நாளில் குழந்தையை சமயபுரம் பகுதியைச் சோ்ந்த தம்பதியிடம் ரூ.4.50 லட்சத்துக்கு விலை பேசி இடைத்தரகா்கள் மூலம் விற்பனை செய்துள்ளனா். பின்னா், மஞ்சு குழந்தையை கேட்டுள்ளாா். ஆனால், வாங்கியவா்கள் கொடுக்கவில்லை.

இதுகுறித்து மஞ்சு அளித்த புகாரின்பேரில், பண்ருட்டி போலீஸாா் வழக்குப் பதிவு செய்து, குழந்தையை மீட்டு வந்து தாயிடம் ஒப்படைத்தனா். மேலும், மஞ்சு, இடைத்தரகா்கள் ஜாபா்கான், முபாரக்கான், சமயபுரம் பகுதியைச் சோ்ந்த ரேணுகாதேவி ஆகியோா் மீது வழக்குப் பதிவு செய்து, ஜாபா்கானை கைது செய்தனா். இந்த நிலையில், முபாரக்கானை சனிக்கிழமை கைது செய்து சிறையில் அடைத்தனா்.