சமூகநலத் துறை விடுதி மாணவா்களுக்கு புதிய உணவு அட்டவணை: சிக்கன் பிரியாணியுடன் முட்டை வழங்கல்

வேப்பூா் அருகே சேப்பாக்கம் அரசு அம்பேத்கா் மேல்நிலைப் பள்ளியில் பயிலும் மாணவா்களுக்கான சமூகநலத் துறை விடுதியில் புதிய உணவு அட்டவணையின்படி மதிய உணவாக சிக்கன் பிரியாணி மற்றும் முட்டை வழங்கப்பட்டது.

தமிழக அரசு விடுதி மாணவா்களின் நலனைக் கருத்தில் கொண்டு, உணவு அட்டவணை மாற்றியமைத்துள்ளது. இதன்படி, மாணவா்களுக்கு தினமும் காலையில் பால், மாலை நேரத்தில் சுண்டல் மற்றும் தேநீா் வழங்கப்படுகின்றன. காலை உணவில் இட்லி, தோசை, பொங்கல், ஊத்தப்பம் உள்ளிட்ட உணவு வகைகள் இடம்பெறுகின்றன. வாரந்தோறும் திங்கள்கிழமை மதிய உணவாக சிக்கன் பிரியாணியும், புதன்கிழமை மதிய உணவாக ஆட்டிறைச்சியும் வழங்கும் வகையில் புதிய உணவு அட்டவணை அமைக்கப்பட்டுள்ளது.

இதன்படி, கடலூா் மாவட்டம் வேப்பூா் அருகே சேப்பாக்கம் அரசு அம்பேத்கா் மேல்நிலைப் பள்ளி வளாகத்தில் உள்ள சமூகநலத் துறை விடுதியில் தங்கி கல்வி பயிலும் மாணவா்களுக்கு, திங்கள்கிழமை மதிய உணவாக சிக்கன் பிரியாணியுடன் முட்டையும் வழங்கப்பட்டது. பள்ளித் தலைமை ஆசிரியா் பிச்சைப்பிள்ளை மாணவா்களுக்கு உணவு வழங்கி தொடங்கி வைத்தாா்.

நிகழ்ச்சியில் விடுதிக் காப்பாளா் விஸ்வநாதன், ஆசிரியா்கள் மற்றும் பள்ளி பணியாளா்கள் கலந்து கொண்டனா்.