கடலூரில் 1-ஆம் எண் புயல் எச்சரிக்கைக் கூண்டு ஏற்றம்

வங்கக் கடலில் புதிய காற்றழுத்த தாழ்வு மண்டலம் உருவாகியுள்ளதையடுத்து, கடலூா் உள்ளிட்ட 9 துறைமுகங்களில் 1-ஆம் எண் புயல் எச்சரிக்கைக் கூண்டு சனிக்கிழமை ஏற்றப்பட்டது.

தென்கிழக்கு வங்கக்கடல் மற்றும் அதையொட்டிய அந்தமான் கடல் பகுதிகளில் நிலவி வந்த குறைந்த காற்றழுத்தத் தாழ்வுப் பகுதி வலுவடைந்து, அதே பகுதியில் காற்றழுத்தத் தாழ்வு மண்டலமாக மாறியுள்ளது. இலங்கையின் திரிகோணமலையிலிருந்து வடகிழக்கே 330 கி.மீ. தொலைவிலும், சென்னைக்கு தென்கிழக்கே 1,140 கி.மீ. தொலைவிலும் காற்றழுத்தத் தாழ்வுப் பகுதி நிலைகொண்டுள்ளது.

இது அடுத்த 12 மணி நேரத்தில் மேற்கு - வடமேற்கு திசையில் நகா்ந்து, தென்கிழக்கு வங்கக்கடல் பகுதியில் ஆழ்ந்த காற்றழுத்தத் தாழ்வு மண்டலமாக வலுப்பெறக்கூடும். தொடா்ந்து, மேற்கு - வடமேற்கு திசையில் நகா்ந்து, தென்மேற்கு மற்றும் அதையொட்டிய மத்திய மேற்கு வங்கக்கடல் பகுதியில் புயலாக வலுப்பெற்று, நவ.2-ஆம் தேதி மாலையில் ஆந்திர கடற்கரையையொட்டி, மத்திய மேற்கு வங்கக்கடல் பகுதியில் கரையைக் கடக்கும் என கணிக்கப்பட்டுள்ளது என சென்னை வானிலை ஆய்வு மையம் தெரிவித்துள்ளது.

இதையடுத்து, தொலைதூர வானிலை எச்சரிக்கையைக் குறிக்கும் வகையில், கடலூா், நாகப்பட்டினம், புதுச்சேரி, காரைக்கால், சென்னை உள்ளிட்ட 9 துறைமுகங்களில் 1-ஆம் எண் புயல் எச்சரிக்கைக் கூண்டு ஏற்றப்பட்டுள்ளது.