விபி ஜி ராம் ஜி திட்டத்தில் முறையாக வேலை வழங்கக் கோரி வட்டார வளா்ச்சி அலுவலகம் முற்றுகை

விபி - ஜி ராம் ஜி திட்டத்தின் கீழ் முறையாக வேலை வழங்கக் கோரி, கள்ளக்குறிச்சி மாவட்டத்துக்குள்பட்ட வாணாபுரம் வட்டார வளா்ச்சி அலுவலகத்தை கிராம மக்கள் வியாழக்கிழமை முற்றுகையிட்டுப் போராட்டத்தில் ஈடுபட்டனா்.

வாணாபுரம் பகுதியிலுள்ள பொற்பாலம்பட்டு, எடுத்தனூா், பழையசிறுவங்கூா், தொண்டநந்தல் உள்ளிட்ட கிராமங்களைச் சோ்ந்தவா்களுக்கு விபி - ஜி ராம் ஜி (125 நாள் வேலை) திட்டத்தின் கீழ் முறையாக பணிகள் வழங்கப்படுவதில்லை என அப்பகுதி மக்கள் குற்றஞ்சாட்டுகின்றனா்.

இதைக் கண்டித்து, இந்தக் கிராமங்களைச் சோ்ந்த ஏராளமான மக்கள் வாணாபுரம் வட்டார வளா்ச்சி அலுவலகத்தை முற்றுகையிட்டு போராட்டத்தில் ஈடுபட்டனா். அப்போது, விபி - ஜி ராம் ஜி திட்டத்தின் கீழ் தங்களுக்கு முறையாக வேலை வழங்க வேண்டும். கடந்த 5 ஆண்டுகளாக 100 நாள் வேலைத் திட்டத்தில் பல்வேறு முறைகேடுகளில் ஈடுபட்ட பணித்தள பொறுப்பாளா்கள் மீது விசாரணை நடத்தி உரிய நடவடிக்கை எடுக்க வேண்டும் என வலியுறுத்தினா்.

தொடா்ந்து, வட்டார வளா்ச்சி அலுவலா் சவுரிராஜ் அவா்களிடம் பேச்சு நடத்தினாா். அப்போது, விபி - ஜி ராம் ஜி திட்டத்தின் கீழ் முறையாக வேலை வழங்கப்படும் என்றும், முறைகேடுகளில் ஈடுபட்டவா்கள் மீது உரிய நடவடிக்கை எடுக்கப்படும் எனவும் அவா் உறுதியளித்தாா். இதை ஏற்று கிராம மக்கள் போராட்டத்தைக் கைவிட்டு கலைந்து சென்றனா்.