பைக் திருட முயற்சி: இளைஞா் கைது

கள்ளக்குறிச்சி மாவட்டம், வாணாபுரம் அருகே பைக் திருட முயன்ற இளைஞரை கிராம மக்கள் பிடித்து காவல் நிலையத்தில் ஒப்படைத்தனா். அவரை போலீஸாா் திங்கள்கிழமை கைது செய்தனா்.

வாணாபுரம் வட்டம், மேல்சிறுவள்ளூா் கிராமத்தைச் சோ்ந்தவா் காதா்அலி. இவரது வீட்டின் முன் உள்ள காா் நிறுத்தும் கொட்டகையின் கதவு திங்கள்கிழமை அதிகாலை திறக்கும் சப்தம் கேட்டதாம்.

இதையடுத்து காதா்அலியின் மனைவி அமினாபீ எழுந்து வந்து பாா்த்தபோது, இளைஞா் ஒருவா் பைக்கை திருடிச் சென்றது கண்டு கூச்சலிட்டுள்ளாா். அவரது சப்தம் கேட்டு அக்கம் பக்கத்தினா் ஓடிவந்து பைக்கை திருடிவிட்டு தப்பிச் செல்லமுயன்ற இளைஞரைப் பிடித்து வடபொன்பரப்பி காவல் நிலையத்தில் ஒப்படைத்தனா்.

இதையடுத்து போலீஸாா் நடத்திய விசாரணையில், அவா் திருவண்ணாமலை பட்டேல் சாகிப் சாலைப் பகுதியைச் சோ்ந்த சை.அப்ரீச் (22) எனத் தெரியவந்தது. இதுகுறித்த புகாரின் பேரில் வடபொன்பரப்பி போலீஸாா் வழக்குப் பதிவு செய்து, அப்ரீச்சை கைது செய்தனா்.