`கோட்’ அப்டேட்: முன்னோட்டப் பார்வை விடியோ

நடிகர் விஜய்க்கு பிறந்தநாள் வாழ்த்து தெரிவிக்கும் விதமாக ஏ.ஜி.எஸ். என்டர்டெயின்மெண்ட் விடியோ ஒன்று வெளியிட்டுள்ளது.

இன்று ஜூன் 22ஆம் தேதியில் நடிகரும் தவெக தலைவரும் விஜய்யின் 50-வது பிறந்தநாளை முன்னிட்டு, விஜய் நடித்து வரும் 68-வது திரைப்படமான ‘கோட்’ படத்தின் தயாரிப்பு நிறுவனமான ஏ.ஜி.எஸ். என்டர்டெயின்மெண்ட், நடிகர் விஜய்க்கு பிறந்தநாள் வாழ்த்து தெரிவிக்கும் விதமாக, தன்னுடைய அதிகாரபூர்வ யூடியூப் பக்கத்தில், நேற்று (ஜூன் 21) நள்ளிரவு 12 மணியளவில் `கோட்’ படத்தின் 50 வினாடி கொண்ட கிளிம்ப்ஸ் விடியோ வெளியிட்டுள்ளது. `கோட்’ கிளிம்ப்ஸ் விடியோ வெளியாகி சில மணிநேரங்களிலேயே சுமார் 10 லட்சத்து 30 ஆயிரம் பார்வைகளைக் கடந்துள்ளது.

அதுமட்டுமின்றி, நடிகர் விஜய்யும், மறைந்த பாடகர் பவதாரணியின் குரலை செயற்கை நுண்ணறிவு மூலமாக வடிவமைத்து, `கோட்’ படத்தின் இரண்டாவது பாடலான ‘சின்ன சின்ன கண்கள்’ இன்று மாலை 6 மணியளவில் வெளியிடப்படும் என்றும் அறிவிக்கப்பட்டுள்ளது.

லியோ படத்தைத் தொடர்ந்து விஜய்யின் 68-வது படமான `கிரேட்டஸ்ட் ஆஃப் ஆல் டைம்ஸ்’ (கோட்) படத்தினை வெங்கட் பிரபு இயக்கி வருகிறார். இந்த திரைப்படத்தில் நடிகர்கள் ஜெயராம், பிரபு தேவா, மோகன், பிரஷாந்த், வைபவ், சினேகா, லைலா, மீனாட்சி சௌத்ரி உள்ளிட்டோர் நடிக்கின்றனர். படத்துக்கு யுவன் சங்கர் ராஜா இசையமைக்கிறார். வருகிற விநாயகர் சதுர்த்தியை முன்னிட்டு செப்டம்பர் 5-ஆம் தேதி திரையரங்குகளில் கோட் படம் வெளியாகவுள்ளது.

இருப்பினும், நடிகரும் தவெக தலைவருமான விஜய், தன்னுடைய பிறந்தநாள் கொண்டாட்டங்களைத் தவிர்த்து, கள்ளக்குறிச்சி மக்களுக்கு உதவுமாறு தவெக நிர்வாகிகளுக்கு உத்தரவிட்டுள்ளார்.