நடிகர் ராம் சரண் நடிக்கும் அவரது 16ஆவது படத்தின் படப்பிடிப்பு தொடங்கியுள்ளது.

பிரபல தெலுங்கு நடிகர் சிரஞ்சீவியின் மகனும் நடிகருமான ராம் சரண் 2007இல் சிறுத்த படம் மூலம் நாயகனாக அறிமுகமானார். பின்னர் ராஜ மௌலி இயக்கத்தில் நடித்த மகதீரா படம் மிகப் பெரிய வெற்றியைப் பெற்று இந்திய அளவில் பிரபலமானார். 2018இல் வெளியான ரங்கஸ்தலம் படமும் நல்ல வரவேற்பினை பெற்றது.

அடுத்து மீண்டும் ராஜமௌலியுடன் ஆர்ஆர்ஆர் படத்தில் நடித்து உலகம் முழுவதும் கவனம் ஈர்த்தார். ஆஸ்கர் வரை ஆர்ஆர்ஆர் படம் இந்தியாவுக்கு பெருமை சேர்த்தது.

தற்போது ஷங்கர் இயக்கத்தில் அவரது 15ஆவது படமான கேம் சேஞ்சரில் நடித்து வருகிறார். இதற்கடுத்து 16ஆவது படத்தில் நடிக்கவுள்ளார். இந்தப் படத்தினை இயக்குநர் உப்பென படத்தினை இயக்கிய புச்சி பாபு சனா இயக்குகிறார். மைத்ரி மூவி மேக்கர்ஸ் உடன் சுகுமார் ரைட்டிங்ஸும் இணைந்து இந்தப் படத்தினை தயாரிக்கிறார்கள்.

இதில் பாலிவுட் நடிகை ஜான்வி கபூர் நடிக்கிறார். ஏ.ஆர். ரஹ்மான் இசையமைக்கிறார். ரதனவேலு ஒளிப்பதிவு செய்கிறார். படக்குழுவுடன் போனி கபூரும் கலந்து கொண்டார்.

இந்தப் படத்தின் பூஜை புகைப்படங்களை படக்குழு இன்று வெளியிட்டுள்ளது. முதல் ஷாட்டினை நடிகர் சிரஞ்சீவி கிளாப் அடித்து துவங்கியது குறிப்பிடத்தக்கது.