என் மகள் மது அருந்துகிறவரா? எச்சரித்த அர்ஜுன்!
தன் மகள் குறித்து தவறாகப் பேசியவர்களுக்கு அர்ஜுன் எச்சரிக்கை விடுத்துள்ளார்...
நடிகர் அர்ஜுன் தன் மகள் குறித்து பரவும் அவதூறுகளுக்குக் கடும் எச்சரிக்கை விடுத்துள்ளார்.
நடிகர் அர்ஜுனின் மூத்த மகள் ஐஸ்வர்யா கடந்த 2024 ஆன் ஆண்டு நடிகர் தம்பி ராமைய்யாவின் மகன் உமாபதி ராமைய்யாவைத் திருமணம் செய்துகொண்டார். இது, இருவீட்டாரின் சம்மதத்துடன் நடைபெற்ற காதல் திருமணம். அண்மையில், அர்ஜுனின் இளைய மகள் அஞ்சனாவின் திருமணம் நடைபெற்றது. இதில், ஐஸ்வர்யா கலந்துகொண்டாலும் உமாபதி ராமைய்யா புகைப்படம் இடம்பெறவில்லை. இதனால், சிலர் இருவரும் பிரிந்து வாழ்ந்து வருவதாகக் கூறியதுடன் ஐஸ்வர்யா குறித்து தேவையற்ற விஷயங்களையும் பகிர்ந்தனர்.
இந்த நிலையில், நடிகர் அர்ஜுன் அறிக்கை ஒன்றைப் பகிர்ந்துள்ளார்.
Advertisement
Advertisement
இதில், ”முதலில், அஞ்ஜனாவின் திருமணத்தை முன்னிட்டு அவருக்கும் எங்கள் குடும்பத்தினருக்கும் தங்களது அன்பையும், மனமார்ந்த வாழ்த்துகளையும் தெரிவித்த அனைவருக்கும் எனது நன்றியைத் தெரிவித்துக் கொள்கிறேன். உங்கள் அன்பும் நல்வாழ்த்துகளும் எங்களுக்கு எப்போதும் மிகுந்த முக்கியத்துவம் வாய்ந்தவை. எங்களை நினைத்து வாழ்த்திய அனைவருக்கும் எங்களது மனமார்ந்த நன்றிகள்.
ஆனால், இதுபோன்ற ஒரு விஷயத்தைப் பொதுவெளியில் பேச வேண்டிய சூழல் ஏற்படும் என்று நான் ஒருபோதும் எதிர்பார்க்கவில்லை.
எனது இளைய மகளின் திருமணத்தின்போது, எனது மூத்த மகள் ஐஸ்வர்யா அர்ஜுனின் தனிப்பட்ட வாழ்க்கை குறித்து பல்வேறு ஊகங்களும் விவாதங்களும் எழுந்தன. அவரது தனிப்பட்ட விஷயங்களில் தலையிடாமல், அவரது தனியுரிமையை மதித்து, அது குறித்து கருத்து தெரிவிப்பதை நான் திட்டமிட்டே தவிர்த்து வந்தேன். ஒவ்வொரு பெண்ணுக்கும் தனது வாழ்க்கையைத் தேர்ந்தெடுக்கும் உரிமையும், தனக்குப் பிடித்தபடி வாழும் சுதந்திரமும் உள்ளது. அவர் விரும்பினால், சரியான நேரத்தில் தனது தரப்பிலான விளக்கத்தை அவரே தெரிவிப்பார்.
ஆனால், ஒரு தந்தையாக, எனது மகளையும் அவரது குணத்தையும் தனிப்பட்ட வாழ்க்கையையும் குறிவைத்து ஆதாரமற்ற மற்றும் மிகவும் இழிவான குற்றச்சாட்டுகள் முன்வைக்கப்படுவதைப் பார்த்துக்கொண்டு என்னால் அமைதியாக இருக்க முடியாது.
நடிகர்களாகிய நாங்கள் பொதுவாழ்க்கையில் இருக்கும்போது, ஊகங்களும் விமர்சனங்களும் தவிர்க்க முடியாதவை என்பதைப் புரிந்துகொண்டுள்ளோம். ஆனால், ஊகங்களுக்கும் அடிப்படை ஆதாரமற்ற குற்றச்சாட்டுகளைத் திட்டமிட்டு பரப்புவதற்கும் இடையே தெளிவான வேறுபாடு உள்ளது. பொதுவெளியில் இருப்பது என்பது யார் வேண்டுமானாலும் கதைகளைப் புனைந்து பரப்புவதற்கோ, ஒருவரின் நற்பெயருக்குக் களங்கம் விளைவிப்பதற்கோ உரிமம் அளிப்பதல்ல. எந்தவித ஆதாரமும் இன்றி ஒரு பெண்ணை மது அருந்தும் பழக்கத்திற்கு அடிமையானவர் என்று முத்திரை குத்துவது உள்ளிட்ட ஆதாரமற்ற மற்றும் இழிவான கருத்துகளைத் தெரிவிப்பது மிகவும் பொறுப்பற்றதும், ஏற்றுக்கொள்ள முடியாததுமாகும்.
அமைதி காப்பதே பல நேரங்களில் கண்ணியமான அணுகுமுறை என்று நாங்கள் எப்போதும் நம்பி வந்திருக்கிறோம். ஆனால், எங்களது மௌனத்தை இதுபோன்ற செயல்களை ஏற்றுக்கொள்வதாகக் கருதக்கூடாது. அதேபோல், தவறான தகவல்கள் தொடர்ந்து பரப்பப்படுவதற்கும் பெரிதாக்கப்படுவதற்கும் எங்களது அமைதி இடமளிக்காது. எனவே, சம்பந்தப்பட்ட அதிகாரிகளிடம் முறையான புகார் அளித்து, உரிய நடவடிக்கைகளை எடுத்துள்ளோம்.
பத்திரிகைத்துறையையும் செய்தி வெளியிடும் பணியையும் நான் மிகுந்த மரியாதையுடன் மதிக்கிறேன். இருப்பினும், உண்மை மற்றும் நம்பகத்தன்மையைப் பற்றி சிறிதும் கவலைப்படாமல், தங்களது செய்திகளைப் பிரபலப்படுத்துவதற்காக ஆதாரமற்ற குற்றச்சாட்டுகளையும் தனிப்பட்ட தாக்குதல்களையும் பரபரப்பாக்கும் சில ஊடகப் பிரிவுகள் தங்களது பொறுப்பைத் தவறாகப் பயன்படுத்துவது மிகவும் வருத்தமளிக்கிறது.
ஒரு தந்தையாக, எனது மகளுக்கு கண்ணியத்துடனும், சுதந்திரத்துடனும் சுயமரியாதையுடனும் தனது வாழ்க்கையை வாழ்வதற்கான அவரது உரிமைக்கு நான் எப்போதும் துணையாக நிற்பேன்.
இனிவரும் காலங்களில் சம்பந்தப்பட்டவர்கள் உரிய கவனத்துடனும் பொறுப்புடனும் செயல்படுவார்கள் என்று நம்புகிறேன். இதுபோன்ற ஆதாரமற்ற மற்றும் அவதூறான குற்றச்சாட்டுகள் தொடர்ந்து பரப்பப்பட்டாலோ அல்லது மேலும் பெரிதாக்கப்பட்டாலோ, அதற்கு எதிராக உரிய சட்ட நடவடிக்கைகள் மேற்கொள்ளப்படும்.
மரியாதையும் கண்ணியமும் ஒருபோதும் சமரசம் செய்துகொள்ளக்கூடியவை அல்ல.
இது எனது மகளைப் பற்றிய விஷயம் மட்டுமல்ல. ஒவ்வொரு பெண்ணின் கண்ணியமும் கேள்விக்குள்ளாக்கப்பட்டு, அவரது தனிப்பட்ட வாழ்க்கை மற்றும் தேர்வுகள் பொதுவெளியில் விமர்சனத்திற்கு உள்ளாக்கப்படுவது குறித்த விஷயமாகும். குறிப்பாக, குடும்பத்தின் ஆதரவு இல்லாத பெண்களுக்கு இதுபோன்ற குற்றச்சாட்டுகள் மிகுந்த பாதிப்பை ஏற்படுத்தக்கூடும். ஏற்கனவே கடினமான சூழ்நிலையில் இருக்கும் அவர்களது வாழ்க்கைப் பயணத்தை இது மேலும் சிக்கலாக்குகிறது. எந்தப் பெண்ணும் இதுபோன்ற சூழலைத் தனியாக எதிர்கொள்ள வேண்டிய நிலை ஏற்படக்கூடாது. தனது வாழ்க்கையைத் தனக்குப் பிடித்தபடி வாழ்வதற்காக எந்தப் பெண்ணும் தன்னை நியாயப்படுத்த வேண்டிய அவசியமும் இருக்கக்கூடாது” எனத் தெரிவித்துள்ளார்.